Беларуская дзяржаўная акадэмія авіяцыі (БДАА) заснавана 1 кастрычніка 1974 г. як Мінскае авіяцыйна-тэхнічнае вучылішча грамадзянскай авіяцыі. Неабходнасць у спецыялізаванай навучальнай установе была выклікана развіццём савецкай грамадзянскай авіяцыі. Вучылішча стала адным з месцаў падрыхтоўкі не толькі лётнага, але і тэхнічнага персаналу для авіяпрадпрыемстваў СССР (тэхнікаў-электрыкаў па эксплуатацыі авіяцыйных прыбораў і электраабсталявання, радыётэхнікаў па тэхнічнай эксплуатацыі радыёабсталявання самалётаў). Першым яго кіраўніком стаў ветэран «Аэрафлота», кандыдат тэхнічных навук П. П. Кліменка. У 1986 г. вучылішчу прысвоена першае месца ў спаборніцтве паміж сярэднімі спецыяльнымі вучэбнымі установамі Міністэрства грамадзянскай авіяцыі СССР. У 1991 г. установа адукацыі перайменавана ў Мінскі авіяцыйны тэхнічны каледж грамадзянскай авіяцыі, у 1994 г. ‒ у Мінскі дзяржаўны авіяцыйны каледж. У 1995 г. рэарганізавана ў Мінскі дзяржаўны вышэйшы лётна-тэхнічны каледж. У 2001 г. перайменавана ў Мінскі дзяржаўны вышэйшы авіяцыйны каледж. Сучасную назву атрымала ў 2015 г.

Цяпер БДАА ‒ сучасны адукацыйны і навуковы цэнтр, які ўносіць важны ўклад у развіццё авіяцыйнай галіны Рэспублікі Беларусь. Акадэмія паспяхова вядзе падрыхтоўку кваліфікаваных кадраў для лётна-тэхнічнай, пад’ёмна-транспартнай, будаўнічай, дарожнай прамысловасці. У яе структуры функцыянуюць факультэт грамадзянскай авіяцыі і ваенны факультэт, аддзяленне сярэдняй спецыяльнай адукацыі, інстытут павышэння кваліфікацыі і перападрыхтоўкі кадраў, аспірантура. Увесь комплекс спецыяльнасцей прызначаны забяспечыць авіяцыйную бяспеку краіны. Практыка-арыентаванае навучанне праходзіць на базе Нацыянальнага аэрапорта «Мінск» і прадпрыемствах авіяцыйнай прамысловасці краіны. БДАА актыўна вядзе распрацоўку навуковых даследаванняў, сярод асноўных кірункаў ‒ радыёлакацыя, радыёнавігацыя і сувязь, авіяцыйныя электрасістэмы і пілатажна-навігацыйныя комплексы, беспілотныя авіяцыйныя комплексы, паветраныя судны і іх сілавыя ўстаноўкі, авіяцыйная бяспека, аэрадромныя сродкі і сродкі механізацыі аэрапортаў. У акадэміі праводзяцца штогадовыя міжнародныя навукова-практычныя канферэнцыі «Актуальные проблемы и перспективы развития авиации» і «Авиация: история, современность, перспективы развития». З 2019 г. выдаецца часопіс «Авиационный вестник».

Матэрыял падрыхтаваны ў 2024 г.