Чыгірынскае вадасховішча размешчана на мяжы Кіраўскага і Быхаўскага раёнаў Магілёўскай вобласці непадалёк ад вёскі Чыгірынка. Вадасховішча створана ў 1960 г. з дапамогай плаціны праз раку Друць, што дало магчымасць пабудаваць невялікую гідраэлектрастанцыю (Чыгірынская ГЭС). Плошча паверхні вадасховішча 21,1 км², максімальная глыбіня 8,1 м, даўжыня 17 км, працягласць берагавой лініі 55 км. Поўны аб’ём вады дасягае 55,9 млн м³. Каля вадасховішча знаходзяцца населеныя пункты Балонаўка, Праточнае, Чыгірынка, Падлужжа, Чачэвічы, Грудзічына, Кароўчына. Возера выкарыстоўваецца ў энергетычных мэтах, для лесасплаву і актыўнага адпачынку.

Вадасховішча з’яўляецца папулярным месцам заняткаў воднымі відамі спорту. На яго беразе размешчаны базы адпачынку і аграсядзібы, дзе турысты могуць займацца рыбалкай, паляваннем, катацца на конях і інш. Летам на берагах вадасховішча праходзіць музычна-спартыўнае свята «Вялікая бард-рыбалка», у якім прымаюць удзел аўтары і выканаўцы бардаўскіх песень, а таксама аматары рыбнай лоўлі.

Матэрыял падрыхтаваны ў 2021 г.