Традыцыя праводзіць фестывалі тэатраў лялек у Мінску пачалася ў 1981 г., калі прайшло першае падобнае мерапрыемства. З 1990 г. фестываль стаў міжнародным і рэгулярна збірае лепшыя тэатры свету ў беларускай сталіцы. Яго арганізатарамі з’яўляюцца Міністэрства культуры Рэспублікі Беларусь, Мінскі гарадскі выканаўчы камітэт, Беларускі дзяржаўны тэатр лялек. Выява Бураціна, які, вызваліўшыся ад апекі лялечніка, лунае ў паветры, – эмблема фестывалю. Мерапрыемства праходзіць на некалькіх пляцоўках беларускай сталіцы: у Беларускім дзяржаўным тэатры лялек, Нацыянальным акадэмічным драматычным тэатры імя М. Горкага, Нацыянальным акадэмічным тэатры імя Я. Купалы, Новым драматычным тэатры, касцёле Св. Сымона і Алены (тэатральная зала), Палацы Рэспублікі. Адметнай рысай з’яўляецца паказ спектакляў, якія грунтуюцца на лепшых традыцыях нацыянальных культур краін-удзельніц фестывалю. Галоўныя задачы мерапрыемства: фарміраванне сусветнай духоўнай прасторы, садзейнічанне распаўсюджванню адвечных чалавечых і духоўных каштоўнасцей, выхаванне маленькіх гледачоў сродкамі мастацтва. На працягу тыдня мінчане і госці сталіцы могуць пазнаёміцца з лепшымі ўзорамі айчыннага і еўрапейскага лялечнага тэатральнага мастацтва апошніх гадоў. Прадстаўленыя спектаклі прызначаюцца для дзяцей і дарослых. Яны пастаўлены паводле літаратурных твораў ці створаны самімі выканаўцамі. Узровень фестывалю адпавядае патрабаванням Статута УНІМА (Міжнароднага саюза дзеячаў тэатра лялек пры ЮНЕСКА). За своеасаблівае прачытанне класікі, акцёрскія ўдачы, цікавую музыку і сцэнаграфію, ужыванне новых тыпаў лялек, творчае асваенне традыцый беларускага народнага тэатра, вяртанне мастацтва беларускай батлейкі калектывы адзначаюцца прызамі і дыпломамі. У фестывалі ўдзельначалі калектывы з Расіі, Украіны, Англіі, Бельгіі, Германіі, Літвы, Польшчы, Славеніі, Чэхіі і інш. З пастаноўкамі з’язджаюцца амаль усе айчынныя тэатры лялек. Прадстаўнічы склад удзельнікаў фестывалю з’яўляецца пацвярджэннем высокага аўтарытэту беларускіх майстроў сцэны ў тэатральным свеце.

Матэрыял падрыхтаваны ў 2013 г.