Наваполацкі завод «Вымяральнік» заснаваны ў 1976 г. Займаўся адзінкавай і дробнасерыйнай вытворчасцю ўнікальнай радыёэлектроннай апаратуры для ваенна-прамысловага комплексу СССР. З кастрычніка 2012 г. уваходзіць у склад холдынга «Гарызонт».

Сёння ААТ «Вымяральнік» – гэта прыборабудаўнічае прадпрыемства па выпуску складанай радыёэлектроннай апаратуры. Тут сканцэнтравана дастаткова сучасная высокапрадукцыйная тэхніка, звышскладаныя навейшыя тэхналогіі па зборцы радыёэлектронных прыбораў, вырабе пячатных плат, мікраэлектроніцы, механічнай апрацоўцы металаў. Выпрабавальны цэнтр аснашчаны ўнікальным абсталяваннем, аналагаў якому няма ў краіне. Асноўныя перавагі прадпрыемства: наяўнасць уласнага падраздзялення распрацоўшчыкаў; скончаны цыкл – ад распрацоўкі, поўнай падрыхтоўкі вытворчасці да пастаноўкі на серыйную вытворчасць складаных радыёэлектронных вырабаў і сістэм, уключаючы дакладную механіку; наяўнасць цэнтра з поўным цыклам выпрабаванняў. ААТ «Вымяральнік» арыентаваны на выпуск прадукцыі вытворча-тэхнічнага і спецыяльнага прызначэння. Ён забяспечаны высокакваліфікаванымі спецыялістамі, якія маюць вялікі вопыт па распрацоўцы і вырабе тэхнічна складанай прадукцыі. Сёння асноўнымі кірункамі дзейнасці з’яўляюцца: вытворчасць вырабаў аўтатрактарнай электронікі; апаратуры спецыяльнага прызначэння для Раскосмасу; камплектуючых вырабаў для мэблевай вытворчасці; электронных вузлоў для сістэм тэлеметрыі і кіравання геаграфічна размеркаванымі аб’ектамі энергетыкі, нафтахіміі, камунальнай гаспадаркі; праектаванне і вытворчасць штампаў, прэс-формаў, металарэзнага інструменту. Значная частка прадукцыі экспартуецца за межы краіны.

Матэрыял падрыхтаваны ў 2018 г.