Біялагічны заказнік рэспубліканскага значэння “Рудакова” быў створаны ў Мядзельскім раёне Мінскай вобласці ў 1991 г. Мэтай заснавання стала зберажэнне ў натуральным стане ўнікальнага леса-балотнага комплексу ў Беларускім Паазер’і.

Ахоўная тэрыторыя плошчай 369 га размяшчалася паміж азёрамі Рудакова і Мядзел. Яе ўзгорысты рэльеф на 82% быў пакрыты бярозавымі, хваёвымі і чорнаалешнікавымі лясамі. На сухадольных і вільготных лугах сустракаліся занесеныя ў Чырвоную кнігу Рэспублікі Беларусь асака воласападобная і птушканожкавая, ятрышнік дрэмлік, гарычка крыжападобная, касач сібірскі, купальнік горны і інш.

У 2001 г. заказнік ліквідаваны (пастанова Савета Міністраў Рэспублікі Беларусь ад 23.05.2001 г. № 745). Яго тэрыторыя ў якасці каштоўнага прыроднага комплексу ўключана ў склад Нацыянальнага парку “Нарачанскі”.

Матэрыял падрыхтаваны ў 2023 г.