Ландшафтны (з 2019 г. рэспубліканскі) заказнік “Бабінавіцкі” быў створаны ў Лёзненскім раёне Віцебскай вобласці ў 1998 г. Мэтай заснавання стала зберажэнне ў прыродным стане ўнікальных ландшафтаў з асабліва каштоўнымі і эталоннымі лясамі і папуляцыямі рэдкіх відаў раслін і жывёл.

Ахоўныя ўгоддзі плошчай 11,5 тыс. га ўяўляюць азёрна-ледавіковую раўніну з рачнымі далінамі і лагчынамі, дзюнамі, камавымі і марэннымі ўзгоркамі. На тэрыторыі знаходзяцца азёры Сітнянскае і Зяленскае, працякаюць рэкі Лучоса, Вярхіта, Чэрніца і інш. У покрыве лес з хвоі, елкі і бярозы. Асаблівую каштоўнасць маюць карэнныя ельнікі, чорнаалешнікі і шырокалісцёвыя лясы з дамешкам дуба, граба, ясеня, ліпы, клёна. Шмат поймавых і сухадольных лугоў. Флора налічве каля 500 відаў вышэйшых сасудзістых раслін, з якіх баранец звычайны, луннік ажываючы, ятрышнік мужчынскі, шпажнік чарапіцавы, лінея паўночная, званочак шыракалісты ўнесены ў Чырвоную кнігу Рэспублікі Беларусь. У складзе фаўны 145 відаў наземных пазваночных. Шмат вавёрак, зайцоў, вожыкаў, лісіц, тхароў, куніц. Сустракаюцца буры мядзведзь, рысь, вялікі кулон, пустальга, пугач, дамавы сыч, сплюшка, чорны бусел і інш.

Заказнік з’яўляецца аб’ектам экалагічнага турызму. На яго тэрыторыі знаходзяцца старажытныя гарадзішчы і курганныя могільнікі, маюцца рэшткі ўмацаванняў XVIII ст. У вызначаныя тэрміны дазваляецца паляванне і рыбная лоўля.

Матэрыял падрыхтаваны ў 2023 г.