Ландшафтны заказнік рэспубліканскага значэння “Стронга” быў створаны ў Баранавіцкім раёне Брэсцкай вобласці ў 1998 г. Мэтай заснавання стала зберажэнне ў прыродным стане ўнікальнага прыроднага комплексу з папуляцыямі рэдкіх відаў жывёл і раслін.

Ахоўная тэрыторыя плошчай 12 тыс. га знаходзіцца на стыку Навагрудскага ўзвышша і Баранавіцкай водна-ледавіковай раўніны і ўяўляе сабой фрагмент ляснога масіву ў міжрэччы рэк Лахазвы, Дзеравянкі і Ісы. Лес пераважна хваёвы, з дамешкам бярозы, чорнай вольхі, елкі, дуба і граба. У флоры шмат гаспадарча-карысных раслін. Сустракаюцца таксама ахоўныя віды – гарлянка пірамідальная, тлушчанка звычайная, званочак рапунцэль, купальнік горны, пальчатакарэннік майскі, сон лугавы, баранец звычайны, касач сібірскі. Сярод ахоўных відаў жывёл – ручаёвая стронга, шыракапальцы рак, арлан-белахвост, скапа, малая паганка, чорны бусел, арэшнікавая соня, барсук, чаротная рапуха, мядзянка і інш.

Матэрыял падрыхтаваны ў 2023 г.