Гідралагічны заказнік рэспубліканскага значэння “Сэрвач” быў створаны ў Докшыцкім і Глыбоцкім раёнах Віцебскай вобласці ў 1997 г. Мэтай заснавання стала зберажэнне ў прыродным стане ўнікальных прыродных балотных комплексаў, стабілізацыя гідралагічнага рэжыму возера і ракі Сэрвач. Заказнік мае статус ключавой арніталагічнай тэрыторыі і Рамсарскага ўгоддзя міжнароднага значэння.

Ахоўная тэрыторыя плошчай 9,1 тыс. га ўяўляе сабой нізіну з марэннымі і камавымі ўзгоркамі, западзінамі і лагчынамі. Лясная расліннасць у асноўным прадстаўлена елкай, хвояй, бярозай павіслай і пушыстай, вольхай чорнай і шэрай. Найбольшае распаўсюджанне атрымала балотная расліннасць – асокі, брыевыя імхі, насякомаедныя расліны (расіца круглалістая і адваротнаяйцападобная). Сярод ахоўных відаў тут сустракаюцца цынклідыум стыгійскі, ліпарыс Лёзеля, пустапялёснік зялёны, сон лугавы, касач сібірскі. У лясах водзяцца лось, дзік, воўк, янотападобны сабака, андатра, чапля-бугай, шэры журавель. Возера Сэрвач насяляюць каштоўныя віды рыб. У прыродным комплексе выяўлена таксама пражыванне птушак, якія знаходзяцца пад пагрозай глабальнага знікнення – дубальта і вяртлявай чарацянкі.

Заказнік з’яўляецца аб’ектам экалагічнага турызму. Для наведвальнікаў распрацаваны водныя, веласіпедныя і пешыя маршруты, арганізуецца сплаў на байдарках, абсталяваны месцы для адпачынку і рыбалкі.

Матэрыял падрыхтаваны ў 2023 г.