Дзякуючы мастацкаму ўзроўню, маштабу і прафесіяналізму Міжнародны фестываль тэатральнага мастацтва “Панарама” стаў самай буйной тэатральнай падзеяй. Ён дапамагае вызначыць месца і ролю беларускага тэатра ў жыцці грамадства і дзяржавы; сфармуляваць задачы тэатральнага мастацтва, дзеячаў тэатра, крытыкаў і ўстаноў культуры і мастацтва па далейшым развіцці і ўдасканаленні тэатра на сучасным этапе. Лепшыя фестывальныя спектаклі дазваляюць убачыць рэальныя змены ў тэатральным працэсе, новыя мастацка-пастановачныя рашэнні, вызначыць сваё месца ў агульнай мастацка-культурнай панараме. Галоўнымі задачамі мерапрыемства з’яўляюцца абмен вопытам і збліжэнне нацыянальных тэатральных школ; азнаямленне беларускага гледача з дасягненнямі сусветнага тэатра, выканаўчым майстэрствам, нацыянальнай драматургіяй, сцэнаграфіяй, музычным афармленнем спектакляў; павышэнне ўзроўню тэатральнай крытыкі; прыцягненне ўвагі грамадскасці да праблем мастацтва і культуры ўвогуле; прапаганда тэатральнага мастацтва; садзейнічанне ўстанаўленню творчых сувязяў паміж драматычнымі тэатрамі; падтрымка творчых кантактаў паміж вядучымі акцёрамі, рэжысёрамі, сцэнографамі краін-удзельніц; набыццё вопыту правядзення шырокамаштабных міжнародных мерапрыемстваў; умацаванне міжнацыянальных культурных сувязяў і сяброўства паміж народамі. У праграму фестывалю ўключаюцца як спектаклі традыцыйнага класічнага кірунку, так і сучасныя эксперыментальныя пастаноўкі. Такі прынцып фарміравання праграмы дае магчымасць убачыць усю палітру сучаснага тэатральнага мастацтва, паказаць найшырэйшы зрэз сучаснага тэатральнага жыцця. Грамадскасць Беларусі атрымала рэдкую магчымасць не толькі пазнаёміцца з самымі перадавымі з’явамі тэатральнай культуры, якія выклікаюць вострую цікавасць і спрэчкі, але і адчуць агульную скіраванасць сусветнага тэатральнага руху, вызначыць месца беларускага тэатра ў гэтым працэсе. Дэвіз фестывалю “Тэатр без меж” адлюстроўвае імкненне арганізатараў даць тэатрам-удзельнікам унікальную магчымасць паказаць спектаклі, розныя па фармаце, жанры, драматургічным матэрыяле і рэжысёрскім рашэнні. Класічны тэатр можа суіснаваць з тэатрам сучасным, мадэрнісцкім, інавацыйным па форме і змесце. Фестываль – гэта адкрытая прастора для абмену вопытам, дыскусій, творчага пошуку, узаемаабмену пастаноўкамі, выканаўцамі і пастановачнымі групамі.

Першы фестываль адбыўся ў Мінску ў 2003 г. пад назвай І Міжнародны фестываль сучаснага тэатра “Адкрыты фармат”. За 18 дзён мінскай публіцы быў прадстаўлены 21 спектакль з 6 краін свету. Праз год мерапрыемства атрымала афіцыйную сучасную назву. Яго арганізатарамі сталі Міністэрства культуры Рэспублікі Беларусь, Мінскі гарадскі выканаўчы камітэт, Нацыянальны акадэмічны тэатр імя Я. Купалы, Беларуская дзяржаўная акадэмія мастацтваў, Беларускі саюз літаратурна-мастацкіх крытыкаў. У ІІ Міжнародным фестывалі тэатральнага мастацтва “Панарама” прынялі ўдзел тэатры з 6 краін свету, якія прадставілі 13 спектакляў. ІІІ Міжнародны фестываль тэатральнага мастацтва “Панарама” адбыўся ў 2007 г. пад дэвізам “Адкрыты фармат”, дзе прадэманстравалі сваё майстэрства тэатры з 10 краін свету. На жаль, двухгадовы перапынак негатыўна паўплываў на тэатральны працэс. Былі перарваны многія творчыя, фінансавыя, асабістыя сувязі. Аднак заснавальнікі фестывалю разумелі, што мерапрыемства такога ўзроўню карысна ўсім: рэжысёрам, драматургам, гледачам. У 2009 г. прайшоў IV Міжнародны фестываль тэатральнага мастацтва “Панарама”. Арганізатары запланавалі не толькі паказ спектакляў, але і круглыя сталы, майстар-класы, семінары, лекцыі. Адметнасцямі фестывалю з’яўляліся праект “Тэатр оnline” і канцэрт эстрадна-музычных ансамбляў, утвораных драматычнымі артыстамі мінскіх тэатраў. На V Міжнародным фестывалі тэатральнага мастацтва “Панарама”, што прайшоў у Мінску ў 2011 г., былі прадстаўлены лепшыя спектаклі калектываў з Беларусі, Венгрыі, Літвы, Польшчы і Расіі, арганізаваны цікавыя творчыя трэнінгі і майстар-класы для маладога пакалення тэатральных творцаў, сустрэчы з замежнымі ўдзельнікамі мерапрыемства. “Панарама” – цудоўная магчымасць для акцёраў, рэжысёраў, мастакоў і кампазітараў сустрэцца, убачыць адзін аднаго ў працы і ацаніць дасягнутае на сцэнічных падмостках. Запланаваныя майстар-класы, круглыя сталы навукоўцаў, тэатразнаўцаў, крытыкаў, сустрэчы з творцамі ў час прэс-канферэнцый дазваляюць удзельнікам гэтых мерапрыемстваў зазірнуць у творчую лабараторыю кожнага з тэатраў-удзельнікаў, сусветна вядомых майстроў сцэны розных краін.

Матэрыял падрыхтаваны ў 2013 г.