Дакладная дата і месца нараджэння Марыяны Бярнацкай невядомы, аднак прынята лічыць, што нарадзілася яна каля 1888 г. у мястэчку Ліпск (зараз Польшча) у сялянскай сям’і ўніяцкага веравызнання. У 1905 г. разам з бацькамі перайшла ў каталіцтва. Пасля замужжа засталася ў родным мястэчку, займалася гаспадаркай.

У гады Вялікай Айчыннай вайны Марыяна жыла разам з сям’ёю сына. Пасля забойства нямецкага афіцэра ў Ліпску гітлераўцы правялі ў мястэчку масавыя арышты. Карнікі прыйшлі і ў хату Бярнацкіх, дзе арыштавалі нявестку Марыяны – Ганну, якая знаходзілася на апошніх тыднях цяжарнасці. Каб уратаваць нявестку і яе будучае дзіця Марыяна маліла забраць сябе замест Ганны. Пасля арышту яна некаторы час утрымлівалася ў турме ў Гродна, пасля чаго 13 ліпеня 1943 г. разам з іншымі 49 вязьнямі была растраляна каля в. Навумавічы (зараз Гродзенскі раён). Так Марыяна аддала сваё жыццё за жыццё нявесткі і ненароджанага ўнука.

Па ўспамінах жыхароў Ліпска Марыяна Бярнацкая была сумленным чалавекам, вылучалася сціпласцю, прастатой і спагадлівым сэрцам. За свой подзвіг у 1999 г. яна ў ліку 108 новамучанікаў часоў Другой сусветнай вайны была далучана Папай Рымскім Янам Паўлам ІІ да ліку благаслаўлёных. Лічыцца нябеснай апякункай ненароджаных дзяцей, тых, якім бацькі не дазваляюць нарадзіцца на свет. Літургічны ўспамін благаслаўлёнай адбываецца ў дзень яе смерці 13 ліпеня, а таксама 12 чэрвеня ў дзень памяці благаслаўлёных мучанікаў Другой сусветнай вайны. Веруючыя Гродна ў дзень ўсіх беларускіх святых наладжваюць у гонар Марыяны Бярнацкай пілігрымку да месца, дзе яна была расстраляна.

Матэрыял падрыхтаваны ў 2018 г.