У пачатку 1920-х гг. у Пружанах, якія ў той час уваходзілі ў склад Польшчы, не існавала сярэдняй агульнаадукацыйнай установы, якая б давала права на здачу ўступных экзаменаў у вышэйшыя навучальныя ўстановы, а бліжэйшыя школы такога ўзроўню знаходзіліся ў Кобрыне і Брэсце. Гэта акалічнасць вельмі клапаціла грамадскасць горада, якая вырашыла ўнесці пытанне аб адкрыцці сярэдняй школы на разгляд гарадскога савета. Урэшце, 21 верасня 1922 г. кураторыум Палескай школьнай акругі вынес станоўчае рашэнне і даў дазвол магістру Пружан на стварэнне гімназіі матэматычна-прыродазнаўчага тыпу за кошт сродкаў горада.

На пасаду першага дырэктара новай навучальнай установы быў запрошаны З. Нячай-Хрузевіч. У хуткасці былі закуплены неабходныя памяшканні, укамплектаваны настаўніцкі калектыў і тры класы навучэнцаў у колькасці 74 чалавек. Сярод першых выкладчыкаў былі: З. Дамброўскі, К. Губараў, М. Лех, М. Солава, А. Саламановіч, К. Пацэвіч, Л. Гнатоўскі і інш. Заступнікам установы аднагалосна абралі паэта А. Міцкевіча, а словы з яго верша ”Песня” размясцілі на штандарце гімназіі побач з выявай Маці Божай Вастрабрамскай:

Прысягу сяброўскую помні,

Няхай кожны дзень і імгненне

Табе свецяць словы,

як промні: Айчына, навука, сумленне!

Урачыстае адкрыццё гімназіі адбылося 3 кастрычніка 1922 г. Навучальны працэс быў арганізаваны па праграме матэматычна-прыродазнаўчых гімназій дзяржаўнага тыпу. Тут выкладаліся польская, нямецкая і лацінская мовы, прыродазнаўства, матэматыка, фізіка, гісторыя, рэлігія (рымска-каталіцкая, праваслаўная, іўдзейская), гімнастыка, спевы, маляванне, ваенная падрыхтоўка і інш. Выкладанне вялося на польскай мове. Навучанне ў гімназіі было платным, аднак прадугледжваліся ільготы. У гімназіі працавалі бібліятэкі – настаўніцкая і вучнёўская, чытальная зала з мноствам энцыклапедый і перыядычных выданняў (выпісвалася больш за 20 найменняў польскіх, французскіх і нямецкіх часопісаў і газет).

Вельмі добра было пастаўлена пазашкольнае навучанне і выхаванне. Дзейнічалі 4 гімназічныя секцыі: гуманістычная, фізіка-матэматычная, фізічнага выхавання і краязнаўчая. На харцэрскіх курсах вывучалася медпадрыхтоўка для палявых умоў дзеяння, ваенная сувязь, картазнаўства, конная язда, зброя, выжыванне ў экстрэмальных абставінах. Існавалі ваенізаваныя арганізацыі “Аб’яднанне моладзі П.С.К.”, “Аб’яднанне школьнае Л.О.Р.Р.”, арганізацыя Польскага Чырвонага Крыжа. Дзейнічалі таксама мужчынскі і жаночы хоры, аркестр, выдавалася насценная газета “Наш шлях” (выйшла 13 нумароў).

У 1923 г. установу наведала акруговая школьная камісія з мэтай вывучэння ўмоў навучання і зацвярджэння яе навуковага ўзроўню, якая па выніках абследавання пастанавіла прысвоіць гімназіі статус “дзяржаўнай”. У 1924 г. гімназія стала гуманітарнай. На той час яна з’яўлялася своеасаблівым культурным цэнтрам Пружан, прымала ўдзел і з’яўлялася ініцыятарам шматлікіх гарадскіх мерапрыемстваў. Пад кіраўніцтвам настаўнікаў вучні праводзілі розныя адмысловыя святы і тэатральныя пастаноўкі, арганізоўвалі вандроўкі па павеце і за яго межамі, летнікі і інш. У верасні 1939 г. пасля далучэння Заходняй Беларусі да БССР Дзяржаўная вышэйшая гімназія імя Адама Міцкевіча была пераўтворана ў сярэднюю школу. Частка калектыву па абвінавачванні ў контррэвалюцыйнай дзейнасці разам з сем’ямі былі высланы ў Расію і Казахстан. Пасля Вялiкай Айчыннай вайны ў будынку гімназіі працавала сярэдняя школа, потым тут размяшчаўся Дом піянераў. У пачатку 1990-х гг. падчас узвядзення новага Палаца культуры ў Пружанах будынак былой гімназіі быў зруйнаваны.

Пружанская гімназія за свой кароткі тэрмін існавання выпусціла шмат вядомых свету людзей, сярод якіх: Л. Прэс, прафесар археалогіі Варшаўскага ўніверсітэта; Ф. Часка, прафесар горнай акадэміі Польшчы; Р. Жук-Грышкевіч, публіцыст, вядомы грамадскі дзеяч; В. Вашкевіч, складальнік першага падручніка “Беларуская мова” для англамоўных вучняў; М. Мартынюк, доктар фізіка-матэматычных навук, прафесар кафедры эксперыментальнай фізікі Расійскага ўніверсітэта дружбы народаў; С. Міхалеўскі, філолаг, член Акадэміі навук Польшчы; С. Малаўскі, хірург, доктар медыцынскіх навук; Т. Цярпілоўскі, прафесар хіміі ў Вроцлаўскім універсітэце; М. Масакоўскі, нейрахірург, прафесар, старшыня Польскай акадэміі навук; В. Гарустовіч, хірург; У. Ягела, генерал авіяцыі; У. Найбіч, афіцэр авіяцыі, кавалер ордэна “Віртуці Мілітары” і інш.

Матэрыял падрыхтаваны Пружанскай цэнтральнай раённай бібліятэкай імя М. Засіма ў 2011 г.