Уладзімір Іларыёнавіч Пастэрнацкі паходзіў з патомных дваран, якія перайшлі ў духоўнае саслоўе. Ён нарадзіўся ў мястэчку Дудзічы Ігуменскага павета Мінскай губерні (цяпер Пухавіцкі раён Мінскай вобласці) у сям’і свяшчэнніка, настаяцеля мясцовай Свята-Пакроўскай царквы. З маленства наведваў гэты храм, прыслужваў на алтары, спяваў у царкоўным хоры. Пасля заканчэння Мінскай духоўнай семінарыі ў 1908 г. быў рукапаложаны ў сан свяшчэнніка і накіраваны ў Петра-Паўлаўскую царкву ў в. Пясочнае (цяпер Уздзенскі раён). З 25 ліпеня 1914 г. У. Пастэрнацкі з’яўляўся памочнікам, з 1917 г. благачынным цэркваў другой акругі Ігуменскага павета. Духавенствам акругі ён на тры гады быў выбраны дэпутатам на Мінскі акруговы вучылішчны з’езд. Восенню 1932 г. пераехаў у Капыль, дзе стаў настаяцелем Спаса-Увазнясенскай царквы. З вясны 1933 г. протаіерэй Уладзімір застаўся адзіным праваслаўным свяшчэннікам на ўвесь Капыльскі раён. У сакавіку 1936 г. У. Пастэрнацкага арыштавалі і асудзілі на два гады калоніі. У снежні 1937 г. вызвалілі, а праз некалькі дзён ён зноў апынуўся за кратамі. Уладзіміра Пастэрнацкага абвінавацілі ў шпіянажы, контррэвалюцыйнай прапагандысцкай дзейнасці і 5 студзеня 1938 г. прыгаварылі да расстрэлу (расстраляны 21 студзеня).

28 кастрычніка 1999 г. разам з іншымі новапакутнікамі, якія нарадзіліся на беларускай зямлі, У. Пастэрнацкі быў кананізаваны і далучаны да Сабора беларускіх святых. Рашэннем Святога сінода Беларускай Праваслаўнай Царквы памяць, у тым ліку і У. Пастэрнацкага (асобны дзень яго памяці 8 (21) студзеня), ушаноўваецца 15 кастрычніка па юліянскім календары (па новым стылі 28 кастрычніка). Да дня ўслаўлення быў створаны абраз “Сабор новапакутнікаў Мінскай епархіі”. Рашэннем юбілейнага архірэйскага сабора Рускай Праваслаўнай Царквы (адбыўся 13–16 жніўня 2000 г.) У. Пастэрнацкі і ўсе беларускія свяшчэннамучанікі ўвайшлі ў расійскі збор новапакутнікаў і праведнікаў і атрымалі статус агульнацаркоўнага ўшанавання.

У 2018 г. на будынку капыльскага Спаса-Узнясенскга храма з’явілася мемарыяльная дошка ў памяць пра свяшчэннамучаніка Уладзіміра Пастэрнацкага.

Матэрыял падрыхтаваны ў 2026 г.