Генадзь Іванавіч Нарскін нарадзіўся ў Гомелі. У юнацкім узросце захапіўся спортам і дасягнуў немалых поспехаў у лёгкай атлетыцы: у 1968 г. стаў фіналістам Усесаюзнай спартакіяды школьнікаў у спаборніцтвах па бегу на 800 м.

У 1969 г. Генадзь Нарскін атрымаў атэстат аб сярэдняй адукацыі, паспяхова здаў экзамены і быў залічаны на факультэт фізічнай культуры Гомельскага дзяржаўнага ўніверсітэта (цяпер Гомельскі дзяржаўны ўніверсітэт імя Ф. Скарыны). Падчас вучобы ва ўніверсітэце стаў пераможцам усесаюзных спаборніцтваў сярод студэнтаў у бегу на 1500 м з перашкодамі. Пасля атрымання дыплома працаваў настаўнікам фізічнай культуры ў васьмігадовай Рагоўскай школе Гомельскага раёна.

У 1974 г. Г.І. Нарскін вярнуўся ў родны ўніверсітэт і стаў працаваць на кафедры лёгкай атлетыкі і лыжнага спорту. Ён удала сумяшчаў трэнерскую і вучэбна-метадычную работу з арганізацыйнай і выхаваўчай. Ім была падрыхтавана вялікая колькасць спартсменаў-лёгкаатлетаў высокага класа: пераможцаў і прызёраў чэмпіянатаў Беларусі і СССР, уладальнікаў Кубкаў Еўропы. У 1980-я гг. Г.І. Нарскін прымаў удзел у рабоце комплекснай навуковай групы, якая рыхтавала зборную каманду СССР па лёгкай атлетыцы, выступаў з дакладамі на усесаюзных і рэспубліканскіх канферэнцыях трэнераў, рыхтаваў артыкулы і метадычныя дапаможнікі. У 1988 г. паспяхова абараніў дысертацыю на тэму «Структура тренировочных нагрузок скоростно-силовой направленности квалифицированных бегунов на средние дистанции в годичном цикле тренировки» і атрымаў вучоную ступень кандыдата педагагічных навук. У 2003 г. Г.І. Нарскін абараніў дысертацыю на тэму «Система профилактики и коррекции отклонений в состоянии опорно-двигательного аппарата у детей дошкольного и школьного возраста средствами физического воспитания» на суісканне вучонай ступені доктара педагагічных навук.

З 1993 г. вучоны працаваў на пасадзе загадчыка кафедры аздараўленчай і лячэбнай фізічнай культуры, займаўся навукова-даследчай работай. З 2000 г. Г.І. Нарскін узначальвае факультэт фізічнай культуры Гомельскага дзяржаўнага ўніверсітэта імя Ф. Скарыны. Дзякуючы свайму кіраўніку факультэт атрымаў новы віток у сваім развіцці, пашырыліся і ўзмацніліся міжнародныя сувязі. Пры непасрэдным удзеле Г.І. Нарскіна была створана Навукова-даследчая лабараторыя алімпійскіх відаў спорту. Супрацоўнікі лабараторыі праводзяць комплексныя даследаванні па аптымізацыі трэніровачнага працэсу беларускіх спартсменаў пры падрыхтоўцы да чэмпіянатаў Еўропы, свету і Алімпійскіх гульняў.

У 2000 г. за заслугі ў развіцці фізічнай культуры і спорту Генадзю Іванавічу Нарскіну было прысвоена ганаровае званне «Заслужаны работнік фізічнай культуры і спорту Беларусі». Вучоны падрыхтаваў шэсць кандыдатаў педагагічных навук, апублікаваў больш за 170 навуковых і метадычных прац. Сёння Г.І. Нарскін працуе над праблемамі ўдасканалення фізічнага выхавання, захаваннем і павышэннем узроўню фізічнага здароўя насельніцтва Беларусі.

Матэрыял падрыхтаваны ў 2013 г.