Ніна Міхайлаўна Каралько нарадзілася ў вёсцы Кашалёва Навагрудскага раёна Гродзенскай вобласці. Скончыла пачатковую школу і з 1949 г. працавала ў калгасе. У 1972 г. пераехала ў Гарадок Віцебскай вобласці і ўладкавалася швачкай на прамкамбінат. Ад сваёй маці і цёткі Ніна Міхайлаўна пераняла майстэрства ткацтва, стварыла багатую калекцыю паясоў, вытканых у тэхніцы ткацтва па ніту. Прымала ўдзел ў шматлікіх выстаўках, фестывалях і конкурсах народнай творчасці, ўзнагароджвалася дыпломамі за ўдзел ва Усесаюзных фестывалях народнай творчасці (1987, 1988), кірмашах народных рамёстваў “Горад майстроў” у рамках Міжнароднага фестывалю мастацтваў “Славянскі базар у Віцебску”. У 2003 г. Ніна Міхайлаўна Каралько ўвайшла ў лік народных майстроў Беларусі. Свае ўменні яна з ахвотай перадавала ўдзельнікам клуба майстроў народных мастацкіх рамёстваў “Вытокі” пры Гарадоцкім доме рамёстваў і фальклору.

Матэрыял падрыхтаваны ў 2022 г.