Палкін Аляксандр Аляксандравіч нарадзіўся ў Архангелькай вобласці (Расія). У 1966 г. скончыў Яраслаўскае тэатральнае вучылішча. З 1966 па 1980 г. працаваў у раённым камітэце камсамола, дырэктарам дома культуры, акцёрам Вялікалуцкага драматычнага тэатра, потым два гады ў Таганрогскім тэатры Растоўскай вобласці. У 1978 г. яму было прысвоена ганаровае званне “Заслужаны артыст РСФСР”. З кастрычніка 1982 г. А. Палкін – артыст Магілёўскага абласнога драматычнага тэатра, у якім служыць і сёння.

На сцэне гэтага тэатра ён выканаў шмат роляў. Сярод іх найбольш яркімі з’яўляюцца: Гастрыт (“Вечар” А. Дударава), Палкоўнік (“Я твая нявеста” В. Астаф’ева), Сальеры, Дон Гуан (“Маленькія трагедыі” паводле А. Пушкіна), Іван Іванавіч (“Антропос” А. Чэхава), Еўдакім Міхеевіч Мешаеў (“Падзея” У. Набокава), (“Нявеста з Парыжа” Б. Рацэра, В. Канстанцінава), Панталоне (“Прынцэса Турандот” К. Гоцы), Пічэм (“Трохграшовая опера” Б. Брэхта), Тарцюф (“Тарцюф” Ж. Мальера). У рэпертуары акцёра ёсць таксама спектаклі для дзяцей. Ён іграў Караля (“Кот у ботах” С. Пракоф’евай і Г.Сапгіра), Кардынала (“Дзікія лебедзі” Х. К. Андэрсана), Купца (“Пунсовая кветачка” паводле С. Аксакава), Мельніка (“Іван-Царэвіч” Ю. Кіма) і іншыя. У 1992 г. акцёр зняўся ў фільме “Крыж на зямлі і поўня ў небе”.

Матэрыял падрыхтаваны ў 2014 г. УК “Магілёўская абласная бібліятэка імя У. І. Леніна”.