Віктар Раманавіч Масюткін нарадзіўся ў вёсцы Дзям’янкі Добрушскага раёна Гомельскай вобласці ў сялянскай сям’і.

У перыяд Вялікай Айчыннай вайны дзіцём перажыў акупацыю роднай вёскі нямецкімі захопнікамі. Пасля вайны атрымаў няпоўную сярэднюю адукацыю ў мясцовай школе і з 1954 г. працаваў механізатарам у саўгасе «Добрушскі». У 1970 г. узначаліў бульбаводчае звяно саўгаса. Звеннявы Масюткін здолеў стварыць згуртаваны і дружны калектыў аднадумцаў, арганізаваць увесь вытворчы працэс. Добрае веданне агратэхнікі вырошчвання бульбы, высокі ўзровень механізацыі палявых работ дазволілі дамагацца высокіх і стабільных вынікаў, штогод збіраючы не менш 300 цэнтнераў клубняў з гектара. Нават у няпростых пагодна-кліматычных умовах дзясятай пяцігодкі бульбаводы не знізілі паказчыкаў працы.

Указам Прэзідыума Вярхоўнага Савета СССР ад 16 сакавiка 1981 г. за выдатныя поспехі, дасягнутыя ў выкананні заданняў дзясятай пяцігодкі і сацыялістычных абавязацельстваў па павелічэнні вытворчасці і продажу дзяржаве збожжа, бульбы і іншых прадуктаў земляробства і жывёлагадоўлі, Віктару Раманавічу Масюткіну прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Віктар Масюткін працаваў у гаспадарцы да выхаду на заслужаны адпачынак. Выбіраўся дэпутатам Добрушскага раённага і Дзям’янкаўскага сельскага Саветаў народных дэпутатаў. Узнагароджаны двума ордэнамі Леніна, ордэнам Працоўнага Чырвонага Сцяга, медалямі. Заслужаны работнік сельскай гаспадаркі Беларускай ССР (1977).

Пераклад 2021 г. матэрыялаў інтэрнэт-праекта «Герои страны».