Барадаўка Іван Міхайлавіч

Date of Birth: 19.05.1925 Зялёная, в., Талачынскі раён, Віцебская вобласць

Date of death: 01.01.1996

Quick reference: работнік сельскай гаспадаркі, Герой Сацыялістычнай Працы (1958)

Names in other languages: Бородавко Иван Михайлович (russian);

Іван Міхайлавіч Барадаўка нарадзіўся ў вёсцы Пляшыўцы (цяпер вёска Зялёная Талачынскага раёна Віцебскай вобласці). Пасля заканчэння сямігодкі вырашыў стаць трактарыстам. Летам 1940 г. падлетак працаваў памочнікам трактарыста, навучыўся араць і сеяць, зімой займаўся тэхнічным абслугоўваннем сельскагаспадарчай тэхнікі, у час Вялікай Айчыннай вайны працаваў у гаспадарцы бацькоў. Пасля вызвалення раёна ўлетку 1944 г. 19-гадовы Іван Барадаўка прызначаны памочнікам брыгадзіра трактарнай брыгады Талачынскай машынна-трактарнай станцыі (МТС), якая абслугоўвала калгас «XVIII партз'езд». За некалькі месяцаў малады механізатар сабраў сабе трактар, узяў сабе вучня – 15-гадовага падлетка з суседняй вёскі – і навучыў яго асноўным відам палявых работ.

У пасляваенны час адчуваўся востры недахоп як у тэхніцы, так і ў кваліфікаваных спецыялістах. І.М. Барадаўка зарэкамендаваў сябе як умелы арганізатар, таленавіты рацыяналізатар і наватар сельскагаспадарчай вытворчасці і праз год быў прызначаны брыгадзірам. Іван Барадаўка выдатна арганізоўваў апрацоўку глебы і паспяхова ўкараняў комплекснае механізаванне на вырошчванні збожжавых і тэхнічных культур, яго брыгада штогод перавыконвала планавыя заданні. Указам Прэзідыума Вярхоўнага Савета СССР ад 18 студзеня 1958 года за выдатныя поспехі, дасягнутыя ў справе развіцця сельскай гаспадаркі і ўкараненне ў вытворчасць дасягненняў навукі і перадавога вопыту Івану Міхайлавічу Барадаўку было прысвоена званне Героя Сацыялістычнай Працы.

З цягам часу І.М. Барадаўка арганізаваў у калгасе «XVIII партз'езд» вячэрнія курсы для спецыялістаў калгаса, якія не ўмелі кіраваць сельскагаспадарчай тэхнікай. Пасля наведвання такіх зяняткаў у выпадку вытворчай неабходнасці працаваць на трактары, дапамагаць камбайнёру маглі і рахункавод, і кладаўшчык, і пастух, і настаўнік, і нават работнік сельскай службы побыту.

З 1978 г. Іван Міхайлавіч Барадаўка працаваў загадчыкам склада запчастак, забяспечваў аператыўны рамонт калгаснай тэхнікі, высокую якасць і ўдарныя тэмпы палявых работ. У 1985 г. выйшаў на заслужаны адпачынак. Узнагароджаны ордэнам Леніна (1958), медалямі.

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта “Герои страны”.