Лідарам піваварнай галіны ў Рэспубліцы Беларусь з’яўляецца ААТ «Лідскае піва». Заснавана ў 1876 г. як завод «Баварыя» лідскім мешчанінам Н. Пупко. Гэта прадпрыемства належала яму і яго нашчадкам на працягу трох пакаленняў. У 1920 г. акрамя піва пачалі вырабляць безалкагольны соладавы напой і хлебны квас. У 1937 г. завод пачаў выпускаць газіраваную ваду і стаў называцца «М. і С. Пупко, саладоўня і вытворчасць газіраваных вод у Лідзе». У 1939 г. завод быў нацыяналізаваны, ранейшыя гаспадары Пупко засталіся працаваць там у якасці служачых. У 1940 г. упершыню зварана піва пад назвай «Жыгулёўскае». У час Вялікай Айчыннай вайны завод працягваў працаваць. У 1960 г. была ўстаноўлена чэхаславацкая канвеерная лінія і лінія па выпуску бутэлечнага піва ёмкасцю 0,33 л. Праз два гады ўведзены ў эксплуатацыю новы цэх па выпуску безалкагольных напояў, пабудавана новае аддзяленне па выпуску квасу. У 1966 г. была распрацавана рэцэптура і выпушчана фірменнае піва «Лідскае». У 1976 г. піўзавод узнагароджаны ордэнам «Знак Пашаны». У гонар стагадовага юбілею створаны новы від піва «Наша марка». У 1990 г. асвоены выпуск піва «Стары замак». У 1994 г. завод пераўтвораны ў акцыянернае таварыства закрытага тыпу «Лідскі піваварны завод». У 1996 г. наладжаны выпуск ліцэнзійнага піва «Hopfenkönig» («Кароль Хмеля») аўстрыйскай фірмы «Эгенбергер Интернационал».

З 2000 г. прадпрыемства мае сучасную назву. У 2006 г. пачалася рэканструкцыя гістарычнага трох’яруснага будынка. У 2007 г. ААТ «Лідскае піва» першым у піваварнай галіне Рэспублікі Беларусь атрымала міжнародны сертыфікат якасці. У 2009 г. быў праведзены рэстайлінг найстарэйшай беларускай маркі «Лідскае». На этыкетку вярнуўся герб, які ўпрыгожваў піва больш за 100 гадоў таму. У гэтым жа годзе прадпрыемства ўвайшло ў склад фінскага канцэрна OLVI. Для завода пачаўся новы этап развіцця. У снежні 2009 г. было прадстаўлена на рынак піва «Лідскае Premium». Гэта першы арыгінальны прадукт, створаны сумеснымі намаганнямі беларускіх і фінскіх тэхнолагаў і спецыялістаў. У рамках інвестыцыйнага праекта канцэрна OLVI на прадпрыемстве пачалася мадэрнізацыя. Устаноўлены дзве новыя лініі. Былі запушчаны ў вытворчасць новыя прадукты: піва «Лідскае Pilsner», сідр «FIZZ», энергетык «Dynami:t». У 2011 г. уведзена ў эксплуатацыю першае ў Беларусі абсталяванне «стэрыльнай фільтрацыі» піва, што дазволіла пастаўляць у гандаль разліўное піва, зваранае па асобай тэхналогіі без пастэрызацыі. У магазінах з’явіўся квас «Лідскі Цёмны» з экстрактам жытняга цёмнага соладу. У 2012 г. быў пабудаваны і ўведзены ў эксплуатацыю новы вытворчы комплекс, які ўключаў у сябе аддзяленне закісання, паспявання і фільтрацыі квасу і піва, новыя кампрэсарная і цэх, абсталяваныя сучаснымі вытворчымі лініямі KHS і Krones, а таксама транспартна-лагістычны цэнтр.

Сёння акрамя асноўнага прадукта – піва – завод выпускае слабаалкагольныя напоі, натуральны квас, безалкагольныя газіраваныя, сокаўтрымальныя, энергетычныя напоі, пітную ваду. Традыцыі броварства, вопыт майстроў-півавараў, пастаяннае тэхналагічнае абнаўленне вытворчасці дазваляюць прадпрыемству вырабляць якасную і запатрабаваную на рынку прадукцыю, якая цэніцца не толькі ў краіне, але і за мяжой, экспартуецца ў Расію, краіны Прыбалтыкі, Польшчу, Германію, Канаду і інш. За ўсю гісторыю свайго існавання кампанія атрымала больш за 140 узнагарод на рэспубліканскіх і міжнародных выстаўках і конкурсах.

Матэрыял падрыхтаваны ў 2020 г.