Кузьма Аляксеевіч Барысаў нарадзіўся ў вёсцы Старая Буда Чавускай воласці Чавускага павета Магілёўскай губерні (цяпер Чавускі раён Магілёўскай вобласці). З 1919 г. ваяваў на франтах грамадзянскай вайны. Пасля дэмабілізацыі з Чырвонай Арміі працаваў на Дняпроўскім металургічным заводзе.

У 1932 г. па камсамольскай пуцёўцы пераехаў у горад Сталінск Заходне-Сібірскага краю (з 1961 г. – Новакузнецк) і стаў працаваць на Кузнецкім металургічным камбінаце, адным з буйнейшых прадпрыемстваў чорнай металургіі ў краіне. Увесь працоўны шлях К.А. Барысава быў звязаны з рэйкабэлечным цэхам, дзе ён працаваў на награвальных печах, дасканала авалодаў прафесіяй зваршчыка і стаў высокакваліфікаваным спецыялістам. У гады Вялікай Айчыннай вайны працягваў працаваць на прадпрыемстве, якое выпускала прадукцыю для абароннай прамысловасці краіны. Узнагароджаны медалём «За доблесную працу ў Вялікай Айчыннай вайне 1941–1945 гг.».

Кузьма Аляксеевіч Барысаў зарэкамендаваў сябе як дысцыплінаваны, добрасумленны і старанны работнік, які доўгія гады заставаўся ў ліку ўдарнікаў вытворчасці, быў пераможцам сацыялістычнага спаборніцтва. Удасканальваючы і паляпшаючы тэхналогію нагрэву металу, ён заўсёды забяспечваў высокапрадукцыйную працу награвальных пячэй. Вялікую ўвагу надаваў павышэнню ўласнай кваліфікацыі, ахвотна дзяліўся вопытам з маладымі рабочымі.

Указам Прэзідыума Вярхоўнага Савета СССР ад 19 ліпеня 1958 г. за выдатныя поспехі, дасягнутыя ў справе развіцця чорнай металургіі, Кузьме Аляксеевічу Барысаву было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Кузьма Аляксеевіч Барысаў быў узнагароджаны двума ордэнамі Леніна (1949, 1958), медалямі «За баявыя заслугі», «За доблесную працу ў Вялікай Айчыннай вайне 1941–1945 гг.», удастоены звання «Ганаровы металург», узнагароджаны значком «Выдатнік сацыялістычнага спаборніцтва».

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта «Герои страны».