Будай Ядвіга Іосіфаўна

Date of Birth: 15.05.1922 Строчыца, в., Мінскі раён

Date of death: ?

Quick reference: работніца сельскай гаспадаркі, Герой Сацыялістычнай Працы (1958), узнагароджаная ордэнамі Леніна (1958), "Знак Пашаны" (1975)

Names in other languages: Будай Ядвига Иосифовна (russian);

Ядвіга Іосіфаўна Будай нарадзілася ў вёсцы Строчыца Старасельскай воласці Мінскага павета (цяпер Мінскі раён). Атрымала няпоўную сярэднюю адукацыю ў мясцовай школе. У пятнаццаць гадоў пераехала ў вёску Весялоўка Мінскага раёна і ўладкавалася на ферму калгаса “Чырвоны агароднік”, які забяспечваў сельскагаспадарчымі прадуктамі Мінск. У час Вялікай Айчыннай вайны нейкі час працавала ў падсобнай гаспадарцы, створанай акупацыйнымі ўладамі на базе калгаса “Чырвоны агароднік”. Пасля вызвалення раёна прымала актыўны ўдзел у аднаўленні калгаса, кіравала паляводчай брыгадай, якая цалкам складалася з жанчын і падлеткаў.

У першы пасляваенны год Яніна Будай вярнулася на ферму. У той час каровы знаходзіліся ў зробленым на скорую руку будане. Праз паўгода Я.І. Будай дамаглася будаўніцтва новага будынку для фермы, што дазволіла палепшыць умовы ўтрымання жывёл і павялічыла надоі малака. У 1952 г. Яніна Будай надаіла ад кожнай першацёлкі па тры тысячы літраў малака і заняла першае месца ў раёне. Паспяхова пераадолеўшы чатырохтысячную мяжу, старанная і мэтанакіраваная даярка выйшла на перадавыя пазіцыі ў вобласці і рэспубліцы: у 1958 г. сярэдні надой ад кожнай каровы яе групы склаў рэкордныя 5100 кілаграмаў.

Указам Прэзідыума Вярхоўнага Савета СССР ад 18 студзеня 1958 г. за выдатныя поспехі, дасягнутыя ў справе развіцця сельскай гаспадаркі і ўкараненне ў вытворчасць дасягненняў навукі і перадавога вопыту Ядвізе Іосіфаўне Будай было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Ядвіга Будай старанна працавала, ахвотна дзялілася сакрэтамі майстэрства. Калі на ферму прыйшла механізацыя, яна адной з першых асвоіла даільныя апараты, дапамагала менш вопытным работнікам. У 1972 г. вёска Весялоўка ўвайшла ў склад Мінска і калгас “Чырвоны агароднік” быў скасаваны. Да выхаду на заслужаны адпачынак Я.І. Будай працавала даяркай у суседнім саўгасе “Азёрны”.

Некалькі разоў Ядвіга Іосіфаўна Будай была ўдзельніцай Выставы дасягненняў народнай гаспадаркі СССР (ВДНГ СССР), з’яўлялася дэлегатам XXII з’езда КПСС (1961), Сусветнага кангрэса жанчын (1963). Узнагароджана ордэнамі Леніна (1958), “Знак Пашаны” (1975), медалямі ВДНГ СССР, Ганаровай граматай Прэзідыума Вярхоўнага Савета Беларускай ССР (1960).

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта "Герои страны".