Надзея Іванаўна Букатая нарадзілася ў вёсцы Траянава Слуцкага павета Мінскай губерні (цяпер Капыльскі раён Мінскай вобласці). Атрымала пачатковую адукацыю ў мясцовай школе і далучылася да нялёгкай сялянскай працы. У шаснаццаць гадоў стала паляводам сельскагаспадарчай арцелі “Камуніст”. У час Вялікай Айчыннай вайны пераехала ў вёску Пацейкі да бацькоў мужа. Пасля вызвалення раёна ў 1944 г. стала працаваць у мясцовым калгасе “Радзіма”. Надзея Букатая заўсёды была адной з перадавых калгасніц: улетку днём вязала жытнёвыя снапы, а ноччу, адпачыўшы гадзіну-другую, ішла на ток; зімой даглядала і коней, і цялят. З 1953 г. пачала працаваць свінаркай. Прыкладам для яе сталі больш вопытныя калгасніцы: яна ўважліва прыглядвалася да іх працы, слухала парады, шукала шляхі паляпшэння спраў у жывёлагадоўлі. Надзея Букатая вывучала спецыяльную літаратуру, цікавілася вопытам перадавых калгасаў і неўзабаве выступіла ініцыятарам пераарыентацыі калгаснай вытворчасці на свінагадоўлю. Добрасумленная і самаадданая праца дружнага калектыву прынесла першыя поспехі. У групе парасят, замацаванай за Надзеяй Букатай, штодзённая прыбаўка ў вазе склала 500 грамаў, што дазволіла калгасу атрымаць дзясяткі тысяч рублёў прыбытку. З цягам часу адкормліваць маладняк даручылі толькі лепшым свінаркам: Надзеі Букатай і Надзеі Белавус. Праўленне калгаса некалькі разоў пасылала перадавых калгасніц у Маскву, дзе яны знаёміліся з вопытам лепшых свінаводаў на Усесаюзнай сельскагаспадарчай выстаўцы. Укараненне ў вытворчасць перадавога вопыту прынесла значныя працоўныя перамогі. У 1956 г. Н.І. Букатая здала дзяржаве 102,7 цэнтнера мяса ў жывой вазе, у 1957 г. – 202,9 цэнтнера, у 1958 г. – 270 цэнтнераў.

Указам Прэзідыума Вярхоўнага Савета СССР ад 18 студзеня 1958 г. за выдатныя поспехі, дасягнутыя ў справе развіцця сельскай гаспадаркі па вытворчасці збожжа, бульбы, ільну, мяса, малака і іншых прадуктаў сельскай гаспадаркі, і ўкараненне ў вытворчасць дасягненняў навукі і перадавога вопыту Надзеі Іванаўне Букатай было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

Надзея Букатая працавала ў калгасе “Радзіма” (цяпер ААТ “Прагрэс”) да апошніх дзён жыцця. Некалькі разоў была ўдзельніцай Усесаюзнай сельскагаспадарчай выстаўкі, узнагароджвалася медалямі і дыпломамі. Як вопытны жывёлавод дапамагала маладым спецыялістам, перадавала ім свой багаты вопыт, выхоўвала любоў да прафесіі. З’яўлялася дэпутатам Вярхоўнага Савета СССР у 1958–1962 гг., была ўзнагароджана ордэнам Леніна (1958), медалём “За працоўную доблесць”.

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта “Герои страны”.