Іван Якаўлевіч Васілюк нарадзіўся ў вёсцы Медна Брэсцкага раёна ў сям’і селяніна-бедняка. З юнацкіх гадоў працаваў слесарам, майстрам, намеснікам начальніка па кадрах вагоннага ўчастка станцыі Кацельнікава Паўночна-Каўказскіх чыгунак.

У 1939 г. уступіў у камуністычную партыю і неўзабаве стаў сакратаром партыйнай арганізацыі, з цягам часу быў пераведзены ў Валгаградскую вобласць Расіі. Іван Васілюк дамагаўся ўкаранення ў вытворчасць дасягненняў навукі і перадавога вопыту, выканання дзяржаўных планаў вытворчасці збожжа, малака, мяса і воўны, чым заваяваў сабе павагу і прызнанне.

У пачатку 1950-х гг. пачалася кампанія па асваенні цалінных і абложных зямель. Іван Васілюк здолеў у кароткі тэрмін рэфармаваць сельскую гаспадарку раёна, зрабіў вядучай галіной вытворчасці вырошчванне цукровай кукурузы. Гэта культура мела складаную агратэхніку, а яе ўраджайнасць залежала ад мноства пагодна-кліматычных фактараў і якасці глебы. Настойлівая праца дала магчымасць у кароткі тэрмін авалодаць сакрэтамі вырошчвання гэтай каштоўнай культуры, збіраць нядрэнныя ўраджаі на мясцовых малапрыдатных землях і закласці трывалы падмурак для развіцця жывёлагадоўлі. Добрая апрацоўка зямлі і паляпшэнне культуры земляробства дазволілі атрымліваць да 30 і больш цэнтнераў зерня з гектара. Асабліва паспяховым для хлебаробаў стаў 1958 г., калі яны сабралі небывалы ўраджай збожжавых – амаль сем мільярдаў пудоў збожжа.

Указам Прэзідыума Вярхоўнага Савета СССР ад 20 лістапада 1958 г. за выдатныя поспехі, дасягнутыя ў справе павелічэння вытворчасці збожжа і іншых прадуктаў сельскай гаспадаркі, Івану Якаўлевічу Васілюку было прысвоена званне Героя Сацыялістычнай Працы з уручэннем ордэна Леніна і залатога медаля “Серп і Молат”.

У 1966 г. за поспехі ў развіцці жывёлагадоўлі І.Я. Васілюк быў узнагароджаны ордэнам “Знак Пашаны”. У 1965–1980 гг. Іван Васілюк – першы сакратар Дубоўскага райкама КПСС Валгаградскай вобласці. Пад яго кіраўніцтвам народная гаспадарка Дубоўскага раёна паспяхова развівалася ў гады восьмай (1966–1970), дзявятай (1971–1975) і дзясятай (1976–1980) пяцігодак. У 1971 г. І.Я. Васілюк быў узнагароджаны другім ордэнам Леніна, праз тры гады атрымаў ордэн Працоўнага Чырвонага Сцяга. За поспехі, дасягнутыя ва Усесаюзным сацыялістычным спаборніцтве, і праяўленую працоўную доблесць у 1976 г. Іван Якаўлевіч Васілюк быў адзначаны другім ордэнам Працоўнага Чырвонага Сцяга.

Пераклад 2020 г. матэрыялаў інтэрнэт-праекта “Герои страны”.