Пётр Міхайлавіч Каласоўскі нарадзіўся ў мястэчку Стараселле Аршанскага павета Магілёўскай губерні (цяпер Шклоўскі раён Магілёўскай вобласці) у сям’і селяніна-бедняка. У 1917 г. скончыў царкоўнапрыходскую школу, у 1922 г. – тры класы Старасельскай школы другой ступені. У пачатку 1920-х гг. уступіў у камсамол і стаў праводзіць тлумачальную работу сярод сялянскай беднаты. Некаторы час працаваў на Аршанскім драцяна-цвіковым заводзе ў вёсцы Барань Аршанскага павета Віцебскай губерні (цяпер горад у Аршанскім раёне Віцебскай вобласці).

У сярэдзіне 1920-х гг. разам з бацькамі пераехаў у Самарскую губерню. У 1926 г. Пётр Каласоўскі быў выбраны сакратаром камітэта камсамола Дзмітрыеўскай воласці Самарскай губерні. Праз некаторы час уступіў у Камуністычную партыю і перайшоў на партыйную работу: быў прапагандыстам, сакратаром партыйнай арганізацыі. У гады Вялікай Айчыннай вайны з’яўляўся сакратаром Молатаўскага райкама партыі Куйбышаўскай вобласці. За актыўную работу па забеспячэнні фронту сельскагаспадарчай прадукцыяй узнагароджаны ордэнам Айчыннай вайны ІІ-й ступені і медалём «За доблесную працу ў Вялікай Айчыннай вайне 1941–1945 гг.». У пасляваенныя гады Пётр Каласоўскі прыкладаў шмат намаганняў для аднаўлення сельскай гаспадаркі і перавыканання планавых паказчыкаў па пастаўках сельгаспрадукцыі.

Указам Прэзідыума Вярхоўнага Савета СССР ад 26 лютага 1948 г. за атрыманне высокіх ураджаяў пшаніцы і жыта пры выкананні калгасам абавязковых паставак і натураплаты за працу МТС у 1947 г. і забяспечанасці насеннем збожжавых культур для веснавой сяўбы 1948 г. Пятру Міхайлавічу Каласоўскаму было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Пётр Каласоўскі быў узнагароджаны ордэнамі Леніна (1948), Айчыннай вайны ІІ-й ступені (1945), медалямі, з’яўляўся дэпутатам Куйбышаўскага абласнога і мясцовых Саветаў дэпутатаў працоўных.

Пераклад 2020 г. матэрыялаў інтэрнэт-праекта «Герои страны».