Рыгор Іванавіч Федарцоў нарадзіўся ў вёсцы Сямёнаўка Рагачоўскага раёна Гомельскай вобласці.

Скончыў сямігадовую школу. У 1950 г. уладкаваўся вучнем фрэзероўшчыка на завод «Гомсельмаш». У 1954 г. па камсамольскай пуцёўцы выехаў на цаліну. Праз некалькі гадоў вярнуўся на завод.

З 1963 г. Рыгор Іванавіч быў фрэзероўшчыкам Гомельскага завода гандлёвага абсталявання. За гады працы праявіў сябе як высокакваліфікаваны майстар, аўтар дзясяткаў вынаходак і рацыяналізатарскіх прапаноў.

Неаднаразова быў выбраны старшынёй цэхкама, членам заводскага камітэта прафсаюзнай арганізацыі, уваходзіў у склад абласнога савета прафсаюзаў, Рэспубліканскага камітэта прафсаюза работнікаў спажывецкай кааперацыі. У 1976 г. узнагароджаны ордэнам Працоўнай Славы III-й ступені, у 1981 г. – II-й ступені. У 1986 г. Рыгор Федарцоў быў узнагароджаны ордэнам Працоўнай славы I-й ступені і стаў поўным кавалерам ордэна Працоўнай Славы.

Рыгор Федарцоў узнагароджаны ордэнам Працоўнай Славы І-й (1986), ІІ-й (1981) і ІІІ-й (1976), медалямі, знакам «Выдатнік спажыўкааперацыі», медалём і знакам лаўрэата ВДНГ СССР.

У 2007 г. імем Рыгора Іванавіча Федарцова названы чэмпіянат па міні-футболе сістэмы Белкаапсаюза.

Пераклад 2021 г. матэрыялаў інтэрнэт-праекта «Герои страны».