Васіль Пятровіч Федаркоў нарадзіўся ў Клімавіцкім павеце Магілёўскай губерні (зараз Хоцімскі раён Магілёўскай вобласці) у сялянскай сям’і.

Працоўную дзейнасць пачаў шахцёрам на здабычы бурага вугалю ў Падмаскоўным вугальным басейне (Масбас). З 1931 г. працаваў на шахце № 18 камбіната «Тулавугаль» і зарэкамендаваў сябе як ударнік стаханаўскага руху. Быў выбраны дэлегатам I-га Усесаюзнага злёту стаханаўцаў у Маскве ў 1935 г.

У час Вялікай Айчыннай вайны Васіль Федаркоў узначальваў адзін з участкаў шахты № 18 і быў перадавым работнікам вытворчасці. Упершыню ў Масбасе ён арганізаваў у сябе на ўчастку выманне вугалю з дзвюх лаў, дзякуючы чаму значна павысілася прадукцыйнасць працы. Дасягненні Васіля Пятровіча Федаркова былі адзначаны ордэнамі Леніна і Працоўнага Чырвонага Сцяга.

У 1948 г. за выдатныя поспехі ў справе павелічэння здабычы вугалю, аднаўлення і будаўніцтва вугальных шахтаў і ўкараненне перадавых метадаў работы Васілю Пятровічу Федаркову было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

З 1949 г. Васіль Федаркоў працаваў галоўным інжынерам шахты. Узнагароджаны ордэнамі Леніна (1948, 1954), ордэнамі Працоўнага Чырвонага Сцяга (1942, 1948), медалямі.

Пераклад 2021 г. матэрыялаў інтэрнэт-праекта «Герои страны».