Вольга Сільвестраўна Шыкунец нарадзілася ў вёсцы Беражное Столінскай гміны Лунінецкага павета Палескага ваяводства Польшчы (цяпер аграгарадок Беражное Столінскага раёна Брэсцкай вобласці)

У гады Вялікай Айчыннай вайны малалетнім дзіцём перажыла нямецкую акупацыю. Пасля вайны атрымала няпоўную сярэднюю адукацыю ў мясцовай школе і пачала працаваць ільнаводам у калгасе «Новае жыццё». За высокі ўраджай ільну была ўзнагароджана медалём Усесаюзнай сельскагаспадарчай выставы (УСГВ). Пасля замужжа пераехала ў вёску Лядзец Давыд-Гарадоцкага (з 1961 г. – Столінскага) раёна. Там жа ў 1957 г. паступіла працаваць паляводам у мясцовы калгас імя Леніна, а праз год перайшла даяркай на малочнатаварную ферму.

У 1963 г. была пераведзена цялятніцай на ферму па адкорме маладняку буйной рагатай жывёлы. Да канца сёмай пяцігодкі (1959–1965) Вольга Сільвестраўна ўвайшла ў лік перадавых жывёлаводаў раёна і вобласці.

У 1966 г. за дасягнутыя поспехі ў развіцці жывёлагадоўлі, павелічэнні вытворчасці і нарыхтовак мяса, малака, яек, воўны і іншай прадукцыі Вользе Сільвестраўне Шыкунец было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Некалькі разоў Вольга Шыкунец прымала ўдзел ва Усесаюзнай сельскагаспадарчай выстаўцы, была ўзнагароджана медалямі і дыпломамі галоўнага выставачнага камітэта. На працягу многіх гадоў займалася вырошчваннем племяннога маладняку, неаднаразова дабівалася самых высокіх паказчыкаў па сярэднясутачных прыбаўленнях вагі, што дазволіла ўдасканаліць тэхналогіі вытворчасці кармоў і мяса. Актыўна ўдзельнічала ў механізацыі працаёмкіх працэсаў у жывёлагадоўлі, займалася настаўніцтвам.

Вольга Сільвестраўна Шыкунец працавала ў калгасе імя Леніна да выхаду на заслужаны адпачынак. Была дэпутатам Брэсцкага абласнога, Столінскага раённага і Лядзецкага сельскага Саветаў дэпутатаў працоўных. Узнагароджана ордэнамі Леніна (1966), «Знак Пашаны» (1973), Ганаровай граматай Вярхоўнага Савета БССР (1987), медалямі.

Пераклад 2021 г. матэрыялаў інтэрнэт-праекта «Герои страны».