Аграгарадок Паўлавічы – цэнтр Паўлавіцкага сельскага Савета Кіраўскага раёна Магілёўскай вобласці – размешчаны за 12 км ад г. Кіраўск. Вядомы з 1560 г. як сяло ў Бабруйскай воласці Рэчыцкага павета Мінскага ваяводства ВКЛ, якое на той час там налічвала 28 двароў. У 1786 г. сяло знаходзілася ў складзе маёнтка Міхалёва і мела 46 двароў. Пасля Другога падзелу Рэчы Паспалітай (1793) увайшло ў склад Расійскай імперыі. У 1870 г. у Паўлавічах налічвалася 56 двароў, 238 жыхароў. Там была пабудавана царква ў гонар Мікалая Цудатворца, якую наведвалі вернікі з навакольных вёсак. У 1884 г. адкрылася царкоўнапрыходская школа, у якой навучаліся 26 хлопчыкаў і 7 дзяўчынак. Працавалі 2 крамы, гасціны двор, 2 вадзяныя млыны і вятрак. У 1909 г. сяло ўвайшло ў склад Бортніцкай воласці Мінскай губерні. У ім было 187 двароў, пражывала 1200 чалавек.

У 1920 г. пачала дзейнічаць чатырохгадовая школа, якая ў 1933 г. была ператворана ў сямігодку. З 1922 г. у Паўлавічах працавала хата-чытальня. У 1929 г. арганізаваны калгас “Чырвоны баец”.

Мірнае жыццё сялян спыніла Вялікая Айчынная вайна. У Паўлавічах былі разбураны культурныя і навучальныя ўстановы, а калгасная гаспадарка была разрабавана. За гады акупацыі фашысты спалілі жывымі 23 жыхары вёскі. У баях каля Паўлавіч загінулі 56 савецкіх воінаў (пахаваны ў брацкіх магілах у цэнтры вёскі). У 1952 г. усім, хто загінуў у гады вайны, узвялі помнік-абеліск.

Аграгарадок Паўлавічы быў створаны ў 2006 г. Ён з’яўляецца цэнтральнай сядзібай СВК “Чырвоны баец”. На тэрыторыі аграгарадка размешчаны машынны двор, зернесушыльны комплекс, піларама, малочнатаварная ферма. Працуюць сярэдняя школа імя Р.А. Худалеева, яслі-садок, фельчарска-акушэрскі пункт, магазін, аддзяленне паштовай сувязі, Дом культуры, бібліятэка, сацыяльны пункт, вытворчы ўчастак УКП “Жылкамгас”, царква ў гонар велікамучаніцы Параскевы Пятніцы (1867).

Матэрыял падрыхтаваны ў 2021 г. на аснове інфармацыі, змешчанай на сайце Кіраўскага райвыканкама.