Адміністрацыйным цэнтрам Стайкаўскага сельсавета з’яўляецца аграгарадок Стайкі, які размясціўся за 40 км ад г. Кіраўск. Яго гісторыя пачынаецца ў ХVIІ ст. Паводле архіўных дакументаў у 1679 г. памешчык І. Булгак прадаў адзін з маёнткаў у Барысаўскім павеце і частку прыгонных сялян перасяліў у Нямкі, а некалькі сямей сталі жыць ва ўрочышчы Стайкі. У канцы ХІХ ст. вёска стала ўласнасцю памешчыка Жукоўскага, у 1871 г. яму належала 678 дзесяцін зямлі, карчма і млын. Згодна з перапісам насельніцтва 1897 г. у Стайках пражывала 148 жыхароў і мелася 20 двароў, у 1909 г. – 157 жыхароў і 24 двары.

У 1901 г. у вёсцы была адкрыта школа граматы. У 1914. у Стайках мелася 26 двароў з насельніцтвам 166 чалавек. У 1931–1932 гг. быў створаны калгас “Стайкі”, інвентар якога складаўся з трох плугоў, чатырох барон і трох коней.

У час Першай сусветнай вайны вёска была акупіравана немцамі, а потым белапалякамі. Каля дзвюх соцень жыхароў Стаек ваявалі на франтах Вялікай Айчыннай вайны, 131 з іх загінуў на фронце, 106 мірных жыхароў былі закатаваны. 25 чэрвеня 1944 г. Стайкі былі вызвалены ад нямецка-фашысцкіх захопнікаў. У 1951 г. жыхары вёскі аб’ядналіся ў калгас імя Свярдлова.

У 2010 г. вёска Стайкі атрымала статус аграгарадка. У цяперашні час на яго тэрыторыі размешчаны сельскагаспадарчы філіял “Чыгірынка” прадпрыемства “Беларуснафта-Магілёўаблнафтапрадукт”. Гандаль і сфера абслугоўвання прадстаўлены магазінам “Тавары паўсядзённага попыту”, аддзяленнем паштовай сувязі, АТС. Працуе дзяржаўная ўстанова адукацыі “Стайкаўскі вучэбна-педагагічны комплекс дзіцячы садок – пачатковая школа”, сельскі клуб, бібліятэка, фельчарска-акушэрскі пункт.

Матэрыял падрыхтаваны ў 2021 г. на аснове інфармацыі, змешчанай на сайце Кіраўскага райвыканкама.