Водна-балотны заказнік рэспубліканскага значэння “Дражбітка-Свіна” быў створаны ў Полацкім раёне Віцебскай вобласці ў 2015 г. Назва паходзіць ад аднайменных рэчак, паміж якімі ён знаходзіцца. Заказнік мае міжнародны ахоўны статус Рамсарскага ўгоддзя.

Тэрыторыя плошчай 6 727 га прадстаўляе сабой адзіны леса-балотны масіў, у якім сустракаюцца ўсе асноўныя тыпы прыродных супольніцтваў, характэрных для Беларускага Паазер’я. Заказнік пранізаны сеткай шматлікіх азёр (Болныра, Жэльцы, Арлея, Дрогава і інш.) з нізкімі забалочанымі берагамі, злучанымі паміж сабой ручаямі і пратокамі. Вялікую каштоўнасць уяўляюць балоты нізіннага тыпу ўздоўж р. Дражбітка. Лясы – хваёвыя, яловыя і дробналісцёвыя – пакрываюць больш за 70% тэрыторыі. У складзе флоры зарэгістравана каля 500 відаў сасудзістых раслін. Шмат ягаднікаў (маліны, брусніцы, дурніцы, чарніцы), лекавых і дэкаратыўных раслін. Сярод ахоўных відаў – баранец звычайны, лінея паўночная, тайнік яйцападобны, асака заліўная, вярба чарнічная, бяроза нізкая і інш. Спалучэнне адкрытых прастораў, лясоў і цяжкадаступных балот вызначае багаты фаўністычны склад гэтай тэрыторыі. У межах заказніка жывуць 189 відаў пазваночных жывёл: казулі, ласі, дзікі, бурыя мядзведзі, рысі, барсукі, ваўкі і інш. У арніталагічных адносінах тэрыторыя ўяўляе каштоўнасць як натуральны рэзерват рэдкіх відаў, занесеных у Чырвоную кнігу Рэспублікі Беларусь. Сярод ахоўных птушак – вялікі бугай, чорны бусел, арлан-белахвост, балотная сава, жоўтагаловы дзяцел, дубальт і інш.

З-за цяжкапраходнасці тэрыторыі турызм у заказніку развіты слаба. Лясы і балоты выкарыстоўваюцца для палявання, збору грыбоў, ягад і лекавыя раслін, а шматлікія азёры – для аматарскага рыбалоўства.

Матэрыял падрыхтаваны ў 2023 г.