Нарадзіўся ў г. Мінск. Са шматдзетнай сям’і служачых.

З 1920 г. прымаў удзел у 2-й Беларускай дзяржайнай тэатральнай трупе Галубка, працаваў рабочым сцэны. Прамаў удзел у ліквідацыі непісьменнасці (1921–1923). Скончыў сямігадовую школу, аднагадзічныя Мінскія агульна-адукацыйныя курсы пры Упраўленні гарадскога аддзела народнай адукацыі (1924), літаратурна-лінгвістычнае аддзяленне педагагічнага факультэта БДУ (1930), аспірантуру пры АН БССР (1934). Навуковы супрацоўнік секцыі этнаграфіі і фальклору Інстытута літаратуры і мастацтва (1931–1933), Інстытута гісторыі АН БССР (1934–1941). У 1939 г. знаходзіўся ў складзе навукова-даследчай экспедыцыі АН БССР, якая працавала ў радзівілаўскім замку ў Нясвіжы. Даследчык беларускага фальклору і літаратуры. Адказны рэдактар – кансультант па мастацкай літаратуры бібліяграфічнага сектара Дзяржбібліятэкі БССР (04.10.1934–27.01.1935), аўтар артыкулаў у “Крытыка-бібліяграфічным бюлетэні”.

У 1941 г. прызваны ў рады РСЧА Мінскім РВК. Удзельнік Вялікай Айчыннай вайны. Старшы лейтэнант адміністрацыйнай службы 210-га стралковага палка 219-й/82-й стралковай дывізіі; 710-га стралковага палка 219-й стралковай дывізіі. Загінуў на фронце/прапаў без вестак.

Працы: друкаваўся з сяр. 1920-х гг. у часопісах “Маладняк”, “Узвышша”, “Заклік”, “Полымя”, “Мастацтва і рэвалюцыя”, газетах “Літаратура і мастацтва”, “Чырвоная змена”, “Звязда” і інш.; дысертацыя па беларускай драматургіі; “Шляхі развіцця БДТ–3” (рукапіс, напісаны разам з бацькам; знік), “Мастацкае выхаванне ў сістэме нашай школы” (рукапіс; знік); адзін з аўтараў зб. “Драматургія” (Мінск, 1934), “Пісьменнік і мова” (Мінск, 1934), складальнік зб. “Дарэвалюцыйная і Савецкая Беларусь у народнай творчасці” (Мінск, 1938), “Беларускі народ супраць папоў і рэлігіі” (Мінск, 1939, сумесна з А. Калечыцам), “Жанчына ў беларускай народнай творчасці” (Мінск, 1940, сумесна з А. Калечыцам і Н. Багдановіч).