Дата рождения:
19.07.1909 Бараўцы, в., Баранавіцкі раён, Брэсцкая вобласць
Дата смерти:
16.09.1939 Аршанскі раён, Віцебская вобласць
Краткая справка:
лётчык, удзельнік вайны ў Іспаніі 1936–1939 гг., першы двойчы Герой Савецкага Саюза (люты і жнівень 1939), узнагароджаны ордэнам Леніна, Баявога Чырвонага Сцяга Манголіі
Имена на других языках:
Грицевец Сергей Иванович (русский);
1963 символа
Справка
Выдатны ваенны лётчык Сяргей Іванавіч Грыцавец пражыў толькі трыццаць гадоў. Аднак вартасць кожнага чалавечага жыцця вызначаецца не колькасцю дзён, адпушчаных лёсам, а значнасцю спраў, напоўненасцю і акрыленасцю імкненняў. У гэтым сэнсе маёр С. Грыцавец – сапраўдны прыклад мужнасці, адвагі, душэўнай стойкасці, прыклад таго, як павінен жыць чалавек.
Сын селяніна з вёскі Бараўцы, што непадалёку ад Баранавіч, ён пасля заканчэння сямігодкі працаваў слесарам на Златаустаўскім механічным заводзе (сям’я Грыцаўцоў у 1915 г. выехала з Беларусі на Урал). У 1932 г. скончыў Арэнбургскую ваенную школу лётчыкаў, а ў 1936 г. – Адэскую школу паветранага бою. Мужнасць С. Грыцаўца, яго арганізатарскія здольнасці, высокае лётнае майстэрства асабліва поўна раскрыліся ў час баёў у Іспаніі. Тут ён збіў трыццаць фашысцкіх самалётаў, у тым ліку сем за адзін дзень. За выкананне спецыяльнага задання ўрада і інтэрнацыянальнага абавязку старшы лейтэнант С. Грыцавец быў удастоены звання Героя Савецкага Саюза. У 1939 г. С. Грыцавец змагаўся супраць японскіх войск на рацэ Халхін-Гол у Манголіі, дзе збіў 12 самалётаў. На Халхін-Голе здзейсніў бяспрыкладны ў авіяцыі подзвіг. У адным з баёў быў збіты камандзір 70-га знішчальнага палка. З парашутам ён выкінуўся і трапіў у размяшчэнне праціўніка. С. Грыцавец прызямліўся побач, узяў камандзіра ў свой аднамесны самалёт і на вачах у ворагаў узняўся ў паветра. За гэта адважнаму лётчыку было ў другі раз прысвоена званне Героя Савецкага Саюза. З верасня 1939 г. С. Грыцавец стаў камандзірам знішчальнага авіяпалка. Загінуў Сяргей Іванавіч 16 верасня 1939 г. у авіякатастрофе каля в. Балбасава Аршанскага раёна, але вечна жыве памяць аб ім. У Мінску, Оршы, Баранавічах, Балбасаве, в. Моўчадзь Баранавіцкага раёна ўстаноўлены помнікі С. Грыцаўцу. Яго імем названы вуліцы ў Маскве, Санкт-Пецярбургу, Мінску, Оршы, Баранавічах, Ганцавічах, а таксама Харкаўскае ваенна-авіяцыйнае вучылішча.