Гардзіцкі Аляксей Кузьміч

Дата рождения: 02.05.1934 Пугачова, в. (цяпер у межах г. Брэст)

Дата смерти: 24.08.1999

Краткая справка: крытык, літаратуразнавец, аўтар прац па пытаннях сучаснай беларускай літаратуры, літаратурных узаемасувязях, складальнік біябібліяграфічных даведнікаў аб пісьменніках

Имена на других языках: Гордицкий Алексей Кузьмич (русский);

Аляксей Кузьміч Гардзіцкі нарадзіўся ў в. Пугачова Брэсцкага раёна (цяпер у межах Брэста) у сялянскай сям’і. Вучыўся ў сярэдняй школе № 7 у Брэсце. У 1956 г. скончыў аддзяленне беларускай мовы і літаратуры Брэсцкага педагагічнага інстытута імя А. С. Пушкіна. Пасля атрымання дыплома працаваў завучам дзіцячага дома і адначасова настаўнікам беларускай мовы і літаратуры ў школе рабочай моладзі ў Мікашэвічах. У 1957 г. А. Гардзіцкі быў выбраны другім сакратаром Ленінскага райкама ЛКСМ Беларусі. У 1959 г. працаваў у рэдакцыі раённай газеты «Ленінская праўда». У 1959–1962 гг. вучыўся ў аспірантуры Інстытута літаратуры імя Я. Купалы Акадэміі навук БССР. У 1962‒1966 гг. быў малодшым навуковым супрацоўнікам гэтага ж інстытута. Затым заняў пасаду старшага рэдактара Дзяржаўнага камітэта Савета Міністраў БССР па друку. У 1972 г. стаў літаратурным кансультантам па ўзаемасувязях літаратур Саюза пісьменнікаў БССР.

Аляксей Гардзіцкі пачаў выступаць у друку з 1953 г. Свае першыя творы публікаваў у брэсцкай абласной газеце «Зара». У 1959 г. у часопісе «Маладосць» была надрукавана яго рэцэнзія на зборнік вершаў У. Нядзведскага «Вясновыя барозны». У першай кнізе А. Гардзіцкага «Дыялогі» (1968) адлюстраваны ўзаемасувязі беларускай літаратуры з літаратурамі іншых народаў. Асаблівасць творчасці пісьменніка ‒ выкарыстанне прыёмаў жывой размовы крытыка і пісьменніка. Ён выдаў шэраг кніг у жанры дыялогу-інтэрв’ю. Аляксей Гардзіцкі імкнуўся высвятляць важныя пытанні псіхалогіі мастацкай творчасці. Праз размовы з пісьменнікамі аналізаваў творчую гісторыю многіх прыкметных з’яў беларускай і замежнай літаратуры. Ён аўтар шматлікіх твораў у жанрах малой прозы, такіх як мініяцюры і літаратурныя эцюды. Творчая спадчына пісьменніка прадстаўлена кнігамі «Сустрэчы» (1972), Вачыма сяброў» (1977), «Сябрына» (1986), «Гутаркі» (1988), літаратуразнаўчымі даследаваннямі «Пра майстэрства дэталі» (1969), «Творчасць Івана Шамякіна» (1971). Аляксей Гардзіцкі з’яўляецца складальнікам біяграфічных даведнікаў «Пісьменнікі Савецкай Беларусі» (1981), «Беларускія пісьменнікі (1917–1990)» (1994).

Матэрыял падрыхтаваны ў 2023 г.