Адным з кіраўнікоў абароны Брэсцкай крэпасці ў Вялікую Айчынную вайну быў Яўхім Майсеевіч Фамін. Нарадзіўся ён у в. Калышкі Лёзненскага раёна Віцебскай вобласці. Яго бацькі рана памерлі, і ён выхоўваўся ў сваякоў. З 12 гадоў пачаў працоўную дзейнасць вучнем цырульніка, затым шаўца ў Віцебску. У 1922 г. быў адпраўлены ў Віцебскі дзіцячы дом. У 1924 г. скончыў школу першай ступені. Затым пераехаў у Пскоў, дзе некаторы час працаваў рабочым на абутковай фабрыцы. У 1929 г. скончыў Пскоўскую акруговую партыйна-савецкую школу. Некаторы час быў на партыйнай і прафсаюзнай рабоце. Па партыйнай мабілізацыі ў 1932 г. накіраваны на партыйна-палітычную работу ў Чырвоную Армію. Працаваў спачатку ў Пскове, потым у Феадосіі і Сімферопалі сакратаром камсамольскай арганізацыі зенітнага палка, палітруком роты, інструктарам палітаддзела стралковай дывізіі, ваенным камісарам стралковага палка. У 1938 г. скончыў курсы пры палітупраўленні Харкаўскай ваеннай акругі. У жніўні гэтага ж года Я.М. Фамін быў прызначаны ваенным камісарам 23-й Харкаўскай ордэна Леніна Чырванасцяжнай стралковай дывізіі. Летам 1940 г. з сям'ёй пераехаў у Даўгаўпілс (Латвія), куды перабазіравалася 23-я дывізія. Ён займаў пасады зампаліта дывізіі, начальніка аддзела прапаганды. Шмат сіл і энергіі Я.М. Фамін аддаваў выхаванню байцоў і камандзіраў, павышэнню іх баявой гатоўнасці. У сакавіку 1941 г. яго перавялі ў распараджэнне Заходняй асобай ваеннай акругі на пасаду намесніка камандзіра па палітычнай часці 84-га стралковага палка 6-й Арлоўскай Чырванасцяжнай стралковай дывізіі, раскваратаванага ў Брэсцкай крэпасці.

Раніца 22 чэрвеня стала для яго баявым хрышчэннем. З першымі разрывамі варожых снарадаў Я.М. Фамін апынуўся ў цэнтры падзей. Абарона крэпасці трымалася выключна на неверагодным патрыятызме, адвазе савецкіх салдат. У наяўнасці быў усяго адзін батальён і некалькі падраздзяленняў вайскоўцаў. Яўхім Фамін прыняў на сябе камандаванне і загадаў байцам заняць абарону ў раёне Холмскіх варот цытадэлі. На працягу некалькіх гадзін яны трымалі абарону. Жанчын і дзяцей адправілі ў падвальныя памяшканні. Для кулямётаў занялі пазіцыі на другім паверсе. Яўхім Фамін і яго байцы засталіся недалёка ад Холмскіх варот. Тут знаходзіўся мост, па якім немцы неаднаразова спрабавалі дабрацца да цэнтра крэпасці. Дасягнуць варот ворагу не ўдавалася на працягу некалькіх дзён. Камісар удзельнічаў у баях, нярэдка сам узначальваў штыкавая атакі. У той час ён разумеў, што раз'яднаныя групы з розных вайсковых часцей не змогуць доўга супраціўляцца, таму імкнуўся аб'яднаць усіх абаронцаў крэпасці. 24 чэрвеня 1941 г. па яго ініцыятыве і актыўным удзеле на нарадзе камандзіраў асобных груп было вырашына пытанне аб аб'яднанні і стварэнні адзінага камандавання і штаба абароны. Камандзірам быў прызначаны капітан І.М. Зубачоў, а яго намеснікам стаў палкавы камісар Я.М. Фамін. Гэтыя меры спрыялі павышэнню арганізаванасці і ўзмацненню стойкасці абароны крэпасці. Былі прыняты спробы прарыву акружэння, аднак яны былі беспаспяховымі. Становішча станавілася ўсё больш цяжкім. Не было вады, прадуктаў харчавання, медыкаментаў, боепрыпасаў. У рэдкіх перапынках паміж баямі камісар імкнуўся сардэчным словам падбадзёрыць байцоў, заклікаў да канца выканаць свой воінскі абавязак. 26 чэрвеня ў час аднаго са штурмаў немцы ўзялі ў палон невялікую групу змучаных, цяжкапараненых салдат, сярод якіх быў іх камісар. 30 чэрвеня Я. Фамін быў расстраляны каля Холмскіх варот.

Званне Героя Савецкага Саюза Я.М. Фамін не атрымаў, але ў 1957 г. пасмяротна быў узнагароджаны ордэнам Леніна. Пра тое, якім быў гэты чалавек, вядома дзякуючы ўспамінам нямногіх яго таварышаў па службе. Пра герояў Брэсцкай крэпасці напісана шмат кніг і створаны фільмы. Вобраз Я.М. Фаміна ўвасаблялі таленавітыя акцёры на тэатральнай сцэне і ў кіно. Сярод фільмаў – мастацкія стужкі «Битва за Москву» (1985), «Брестская крепость» (2010), дакументальна-ігравы фільм «Брест. Крепостные герои» (2010). Імем Я.М. Фаміна названы вуліцы ў Брэсце, Лёзне, Мінску, Пскове. На месцы расстрэлу ўстаноўлена мемарыяльная дошка.

Матэрыял падрыхтаваны ў 2019 г.