У 2010 г. наша краіна адзначала 90-годдзе з часу заснавання Беларускага нацыянальнага тэхнічнага ўніверсітэта (ранейшыя назвы: Беларускі політэхнічны інстытут, Беларуская дзяржаўная політэхнічная акадэмія). Сярод выпускнікоў гэтай установы – шматлікія знакамітыя майстры нацыянальнай архітэктурнай школы. У іх ліку і Уладзімір Эдуардавіч Сакалоўскі.

Архітэктурны факультэт Беларускага політэхнічнага інстытута ён скончыў у 1958 г. У 1958–1961 гг. працаваў у інстытуце “ Белдзяржпраект”. У 1965–1969 гг. – галоўны архітэктар, з 1972 г. – дырэктар БелНДІдзіпрасельбуда. Адначасова з 1965 г. выкладаў у Беларускім політэхнічным інстытуце (з 1972 г. – дацэнт). Кіраўнік і ўдзельнік праектаў забудовы эксперыментальна-паказальных пасёлкаў на Беларусі (1960–1970 гг.). З 1992 па 2000 г. – галоўны эксперт Галоўэкспертызы Міністэрства архітэктуры і будаўніцтва Рэспублікі Беларусь.

Асноўныя работы (усе ў суаўтарстве): праект дэталёвай планіроўкі і забудовы Салігорска (1959–1960), праекты дэталёвай планіроўкі зон адпачынку на Заслаўскім вадасховішчы пад Мінскам і возеры Нарач у Мядзельскім раёне (1959–1960), дом адпачынку на возеры Нарач (1959–1961), будынак БелНДІдзіпрасельбуда і лабараторны корпус завода імя Вавілава ў Мінску (1969), праект і забудова пасёлка Малеч у Бярозаўскім раёне (1969–1981). Уладзімір Сакалоўскі з’яўляўся кіраўніком навуковай тэмы “Пераўстройства архітэктуры беларускага сяла”. Ён лічыў, што перспектыва архітэктуры сёл Беларусі – за буйнымі населенымі пунктамі, у якіх павінны быць створаны ўсе ўмовы для працы, адпачынку і быту сельскіх працаўнікоў.

У 1966 г. У. Сакалоўскі абараніў кандыдацкую дысертацыю па тэме “Архитектурно-планировочная организация системы культурно-бытового обслуживания в сельской местности БССР”. Архітэктуры сяла прысвечаны і многія яго навуковыя працы. У суаўтарстве з іншымі спецыялістамі ім напісаны і выдадзены: “Проектирование и строительство промышленных комплексов” (1975), “Архитектура нового белорусского села” (1979), “Благоустройство и озеленение сельских населенных пунктов” (1980), “Сельский индивидуальный жилой дом (справочное пособие)” (1985, 2-е выд. 1990), “Архитектура Советской Белоруссии” (1986), “Архитектура сел Украины и Белоруссии” (1990).

У 1979 г. У. Сакалоўскаму прысвоена званне заслужанага архітэктара БССР, у 1981 г. – лаўрэата прэміі Савета Міністраў СССР.

Матэрыял падрыхтаваны ў 2011 г.