Вядомы беларускі і польскі пісьменнік Ігнат Іосіфавіч Шыдлоўскі нарадзіўся ў мястэчку Гайна на Лагойшчыне ў сям'і ўніяцкага свяшчэнніка. Вучыўся ў Мінскай гімназіі, потым у Віленскім універсітэце, дзе атрымаў званне магістра філасофіі. Будучы студэнтам І. Шыдлоўскі стаў актыўным членам літаратурна-грамадскага таварыства шубраўцаў, да якога належалі многія прагрэсіўныя дзеячы навукі, культуры і мастацтва Літвы і Беларусі. Арганізацыя была створана ў Вільні ў 1816 г., мела ліберальна-асветніцкі кірунак (існавала да 1822 г.). Пасля заканчэння ўніверсітэта І. Шыдлоўскі выкладаў рыторыку, паэтыку і гісторыю літаратуры ў Свіслацкай і Віленскай гімназіях, пазней працаваў у Віленскім універсітэце. У 1818–1822 гг. ён рэдагаваў часопіс «Tygodnik Wilenski» («Віленскі штотыднёвік»). У 1826–1828 гг. быў віленскім цэнзарам. На працягу некалькіх гадоў (1835–1843) займаўся рэдагаваннем і выданнем часопіса «Wirerunki і roztrzasania naukowe» («Абразкі і навуковыя разгляды»).

Ігнат Шыдлоўскі друкаваўся амаль ва ўсіх тагачасных перыядычных выданнях. Ён з'яўляецца аўтарам од «Шчасце і мір» (1812), «Да Яна Снядэцкага» (1819), «Гарадніца, ода, прысвечаная памяці Антона Тызенгаўза» (1820), «Дабрачыннасць» (1823), лірычнай сцэнкі «Агар у пустыні» (1830). Выдаў зборнікі «Выбар розных жанраў паэзіі» (1818), «Лацінскія ўрокі літаратуры і маралі, або зборы прозы і вершаў вядомых старажытных лацінскіх аўтараў» (1820) і інш. Перакладаў на польскую мову творы Г. Дзяржавіна, Дж. Байрана, а таксама старажытных грэчаскіх і рымскіх аўтараў. У 1819 г. І. Шыдлоўскі змясціў у часопісе «Віленскі штотыднёвік» артыкул на польскай мове «Вясельныя абрады вясковага прастанароддзя ў Мінскай губерні Барысаўскім павеце Гаенскай парафіі, назіраныя ў 1800, 1801 і 1802 гадах з некаторымі песнямі і нотамі», якія пазней былі выкарыстаны ў працах Я. Тышкевіча, П. Шэйна, О. Колберга і ў фальклорным зборніку «Вяселле» (1978). Некаторыя даследчыкі лічаць І. Шыдлоўскага яго аўтарам. Паводле іншых звестак артыкул напісаў ураджэнец Лагойшчыны З. Даленга-Хадакоўскі.

Матэрыялы падрыхтаваны ў 2018 г.