Казімір Вікенцій Хршчановіч нарадзіўся ў маёнтку Бястроск каля былой в. Шунеўка Докшыцкага раёна Віцебскай вобласці. У 1819 г. скончыў Віленскі ўніверсітэт з навуковай ступенню кандыдата філасофіі. Некалькі гадоў займаўся выкладчыцкай дзейнасцю. У сакавіку 1824 г. быў прызначаны памочнікам архітэктара Віленскага ўніверсітэта. Пасля здачы дадатковых экзаменаў у маі 1825 г. атрымаў дыплом і быў прызначаны архітэктарам Мінскай губерні. На працягу 40 год К. Хршчановіч удзельнічаў у стварэнні праектаў жылых і адміністрацыйных будынкаў Мінскай губерні. Сярод яго прац у Мінску – губернатараскі дом і будынкі вайсковага шпіталя па вул. Фрунзе (1830-я гг.), мужчынская гімназія па вул. Леніна (1844), гарадская бальніца (1840-я гг.), Мінскі адміністрацыйны будынак на пл. Свабоды (1852) і інш. Архітэктар таксама з’яўляўся аўтарам праектаў ратушы (1825) і жылога дома Аксельрода (1844) у Мінску, адміністрацыйных устаноў у Барысаве (1843), жылога дома А. Ліпко (1847) у Пінску і інш.

Матэрыял падрыхтаваны ў 2019 г. у Мінску