У гісторыю беларускай філалогіі і культуры навечна ўпісана імя руплівага даследчыка роднага слова, знакамітага вучонага і пісьменніка Фёдара Міхайлавіча Янкоўскага.

Нарадзіўся Ф. Янкоўскі ў вёсцы Клетнае былога Бабруйскага павета Мінскай губерні (цяпер Глускі раён Магілёўскай вобласці). Скончыў Рагачоўскі педагагічны тэхнікум. Працаваў школьным настаўнікам і адначасова завочна вучыўся ў Мінскім настаўніцкім інстытуце. Зведаў жахі дзвюх войнаў. З савецка-фінляндскай вайны вярнуўся інвалідам. У час Вялікай Айчыннай вайны страціў жонку і маленькую дачку, якіх спалілі фашысты. Быў партызанам-разведчыкам, узначальваў разведку атрада “Грозны”, які дзейнічаў паблізу Мінска, і таксама быў цяжка паранены.

У пасляваенныя гады Ф. Янкоўскі скончыў Гродзенскі педінстытут імя Я. Купалы (1948), потым аспірантуру пры Мінскім педінстытуце імя М. Горкага (1954). З гэтым інстытутам, які мае цяпер назву БДПУ імя М. Танка, былі звязаны 36 год яго працоўнага жыцця. Тут у 1953 г. ён пачаў сваю дзейнасць як выкладчык беларускай мовы, у 1956–1982 гг. узначальваў кафедру беларускага мовазнаўства, якая пры Ф. Янкоўскім стала адным з вядучых навуковых цэнтраў філалогіі ў рэспубліцы. На пасадзе прафесара ён працягваў працаваць на кафедры да апошніх дзён жыцця. Кіраваў падрыхтоўкай маладых спецыялістаў, вучоных, быў членам некалькіх спецыялізаваных саветаў па абароне доктарскіх і кандыдацкіх дысертацый. Шмат гадоў Ф. Янкоўскі ўзначальваў Рэспубліканскае метадычнае аб’яднанне лінгвістаў-беларусаведаў, быў членам Рэспубліканскага камітэта славістаў, старшынёй лінгвістычнай секцыі навукова-метадычнага савета Міністэрства асветы Беларусі.

Круг навуковых інтарэсаў Ф. Янкоўскага быў шырокім і шматгранным. У творчай спадчыне вучонага каля трохсот прац: манаграфіі, слоўнікі, дапаможнікі, падручнікі, артыкулы па беларускім і агульным мовазнаўстве, культуры мовы, але ў большасці публікацый сваю ўвагу ён аддаваў вывучэнню скарбаў народнай мовы. Родным глускім гаворкам была прысвечана кандыдацкая дысертацыя Ф. Янкоўскага і тры выпускі “Дыялектнага слоўніка” (1959, 1960, 1970), матэрыял якіх быў зафіксаваны таксама ў Глускім раёне.

Вучоны вельмі любіў і цаніў народную прыказку, трапнае народнае выслоўе. У 1957 г. выйшаў складзены Ф. Янкоўскім зборнік “Беларускія народныя прыказкі, прымаўкі”, які ўключаў пяць тысяч гэтых устойлівых моўных адзінак. Зборнік быў станоўча прыняты грамадскасцю і ў 1962 г. выйшаў другім выданнем пад назвай “Беларускія прыказкі, прымаўкі і фразеалагізмы”, прычым колькасць прыказак, прымавак, устойлівых народных параўнанняў і фразеалагізмаў у ім была даведзена да васьмі тысяч. Апошняе, чацвёртае, выданне гэтага зборніка выйшла ў свет у 2004 г.

Цікавіла даследчыка і праблема афарыстычнасці слова. У 1960 г. ён выдаў кнігу “Крылатыя словы і афарызмы: з беларускіх літаратурных крыніц”. Гэта была першая ў беларускім мовазнаўстве спроба навуковага асэнсавання ролі крылатых слоў і выслоўяў у сучаснай беларускай літаратурнай мове. Шэраг артыкулаў вучоны прысвяціў афарызмам Я. Коласа, Я. Брыля, Ядвігіна Ш., А. Пашкевіч.

Важнай падзеяй у беларускім мовазнаўстве стаў выхад тлумачальнага слоўніка беларускай народнай фразеалогіі “Беларуская фразеалогія. Фразеалагізмы, іх значэнне і ўжыванне” (1968), пра які вучоны-славіст Карл Гутшміт сказаў, што гэта праца адзіная ў сваім родзе ў славістыцы.

Акрамя збірання і публікацыі фразеалагічных багаццяў роднай мовы, Ф. Янкоўскі займаўся і тэарэтычнай распрацоўкай гэтых моўных адзінак. Ёй прысвечаны яго доктарская дысертацыя (1969), а таксама навуковыя працы “Роднае слова” (1967, 1972), “Беларуская мова” (1978), “Беларуская фразеалогія” (1968, 1981), “Сучасная беларуская мова” (1984). Гэтыя працы вызначаюцца глыбінёй даследавання, багаццем і надзейнасцю ілюстрацыйнага матэрыялу. Яны атрымалі высокую ацэнку вучоных-філолагаў і пісьменнікаў.

Значнае месца сярод даследаванняў Ф. Янкоўскага займалі працы, прысвечаныя пытанням нармалізацыі і культуры беларускай літаратурнай мовы. Чатыры разы перавыдавалася (з некаторымі папраўкамі, удакладненнямі і дапаўненнямі) яго кніга “Беларускае літаратурнае вымаўленне” (1960, 1966, 1970, 1976). Клопатам пра правільнае ўжыванне слоў, іх літаратурнае вымаўленне прасякнуты працы “Пытанні культуры мовы” (1961) і “Вусная мова і выразнае чытанне” (1962).

Вялікую ўвагу надаваў Ф. Янкоўскі стварэнню вучэбных дапаможнікаў. Асабліва цікавым і каштоўным з’яўляецца падрыхтаваны ім дапаможнік для студэнтаў “Гістарычная граматыка беларускай мовы”, які таксама вытрымаў некалькі выданняў (1974, 1983, 1989). Гэта быў глыбока навуковы і разам з тым даступны для студэнтаў падручнік. Высока ацэньваліся і дапаможнікі, у якіх Ф. Янкоўскі выступаў як сааўтар і рэдактар.

З імем вучонага звязаны і такі аспект лінгвістыкі, як аналіз мовы мастацкага твора. Створаная ім беларуская лінгвістычная школа праводзіла даследаванні па тэме “Слова, фразеалагізм, словазлучэнне ў кантэксце”. Пад такой назвай ці па такой тэме, пачынаючы з 1975 г., выходзілі зборнікі навуковых артыкулаў, нязменным кіраўніком і рэдактарам якіх быў Ф. Янкоўскі.

Сведчаннем яшчэ адной грані таленту гэтага чалавека з’яўляюцца яго зборнікі мастацкай прозы, якія вучоны пачаў друкаваць ужо ў сталым узросце. Апавяданні-мініяцюры Ф. Янкоўскага пачалі з’яўляцца на старонках перыядычных выданняў з 1973 г. Пазней гэтыя апавяданні-мініяцюры склалі зборнікі “Абразкі” (1975), “І за гарою пакланюся” (1982), “Радасць і боль” (1984), “З нялёгкіх дарог” (1988). У іх пісьменнік апавядае пра сваё дзяцінства, ваенныя гады, сучаснае жыццё, сустрэчы з цікавымі людзьмі. Проза Ф. Янкоўскага з’явілася арганічным працягам яго філалагічнай дзейнасці і цудоўна адлюстроўвала, як тонка ведаў і адчуваў родную мову пісьменнік. Апавяданні-мініяцюры, у якіх ён расказвае пра пачутыя цікавыя словы і выразы, склалі кнігу “Само слова гаворыць” (1986), вельмі высока ацэненую спецыялістамі і пісьменнікамі.

За сваю плённую педагагічную і навуковую дзейнасць Ф. Янкоўскі быў адзначаны ганаровым званнем “Заслужаны дзеяч навукі БССР”. Сярод яго ўзнагарод – ордэны Чырвонай Зоркі, Айчыннай вайны I ступені, “Знак Пашаны”, медалі, ганаровыя граматы.

Матэрыял падрыхтаваны ў 2008 г.