Вялікі ўклад у стварэнне беларускай навуковай школы па распрацоўцы радыёфізічных метадаў і інфармацыйна-вымяральных сродкаў унёс Аляксандр Фёдаравіч Чарняўскі. Ён нарадзіўся ў Разані (Расія) у сям'і служачых. Пасля заканчэння школы паступіў на факультэт аўтаматыкі і тэлемеханікі Разанскага радыётэхнічнага інстытута (цяпер Разанскі дзяржаўны радыётэхнічны ўніверсітэт), які скончыў з адзнакай у 1960 г. Два гады малады спецыяліст працаваў на пасадзе інжынера ў г. Каломне Маскоўскай вобласці.

У 1962 г. Аляксандр Чарняўскі паступіў у аспірантуру Беларускага дзяржаўнага ўніверсітэта (БДУ), якую скончыў з навуковым званнем кандыдата фізіка-матэматычных навук па спецыяльнасці «Радыёфізіка». У 1971 г. вучоны абараніў доктарскую дысертацыю па спецыяльнасці «Інфармацыйна-вымяральныя сістэмы». Навуковая дзейнасць А.Ф. Чарняўскага была непарыўна звязана з выкладчыцкай працай: пэўны час вучоны ўзначальваў кафедру электронных матэматычных машын (1973–1979), з 1986 г. кіраваў кафедрай інтэлектуальных сістэм Беларускага дзяржаўнага ўніверсітэта. У 1987 г. А.Ф. Чарняўскі быў абраны членам-карэспандэнтам НАН Беларусі, а з 1994 г. – акадэмікам. Тэарэтычныя распрацоўкі вучоны правяраў на практыцы: займаў пасады інжынера, старшага навуковага супрацоўніка, загадчыка сектара БДУ. У 1971–1979 гг. узначальваў лабараторыю, аддзел сродкаў аўтаматызацыі навуковых даследаванняў НДІ прыкладных фізічных праблем БДУ (цяпер Інстытут прыкладных фізічных праблем імя А.Н. Сеўчанкі БДУ, НДІПФП). З 1979 г. на працягу дваццаці гадоў А.Ф. Чарняўскі ўзначальваў гэты інстытут.

Асноўнымі кірункамі навуковых даследаванняў вучонага з'яўляецца развіццё тэорыі параметрычнага ацэньвання выпадковых паслядоўнасцей хуткапераменных сігнальных патокаў на фоне высокаінтэнсіўных шумавых патокаў у фізічным эксперыменце; распрацоўка пазіцыйна-мадулярных метадаў і прылад паралельна-канвеернай апрацоўкі інфармацыі, аўтаматызаваных інфармацыйна-аналітычных сістэм кіравання тэхналагічнымі працэсамі і вытворчымі аб'ектамі. Вялікі уклад А.Ф. Чарняўскі ўнёс у распрацоўку тэорыі, апаратных і праграмных сродкаў забеспячэння эксперыментальных даследаванняў у ядзернай фізіцы, акустыцы, фізіцы плазмы, лазернай фізіцы, дыстанцыйнай фотаметрыі, фізіцы ўзаемадзеяння магутнага электрамагнітнага выпраменьвання з рознымі сродкамі і матэрыяламі і інш. Галоўныя навуковыя вынікі былі атрыманыя ім пры стварэнні аўтаматызаваных інфармацыйна-адукацыйных і інфармацыйна-аналітычных сістэм для органаў дзяржаўнага кіравання.

Аляксандр Фёдаравіч Чарняўскі падрыхтаваў больш за 40 кандыдатаў і дактароў навук, апублікаваў больш за 300 навуковых прац, у тым ліку 8 манаграфій, мае 77 аўтарскіх пасведчанняў на вынаходніцтвы.

У 1979 г. А.Ф. Чарняўскаму было прысвоена ганаровае званне «Заслужаны дзеяч навукі і тэхнікі БССР». За стварэнне і ўкараненне ў вучэбны працэс аўтаматызаваных інфармацыйна-адукацыйных сістэм на базе ЭВМ у 1984 г. яму была прысуджана прэмія Савета Міністраў СССР. За распрацоўку і ўкараненне ў практыку оптыка-фізічных даследаванняў статыстычных метадаў часовага аналізу хуткапераменных патокаў светлавога выпраменьвання вучоны быў адзначаны Дзяржаўнай прэміяй БССР (1986), за распрацоўку і укараненне ў народную гаспадарку сістэм вымярэння пазіцыйна-мадулярнага тыпу – Дзяржаўнай прэміяй СССР (1991).

Аляксандр Фёдаравіч Чарняўскі і сёння заняты навукова-арганізацыйнай і грамадскай працай: з’яўляецца старшынёй рэдакцыйнай калегіі часопіса «Электроника инфо», членам рэдкалегіі часопісаў «Весці НАН Беларусі. Серыя фізіка-матэматычных навук» і «Вестник БГУ. Серия 1. Физика. Математика. Информатика», узначальвае спецыялізаваны Савет па абароне доктарскіх дысертацый.

Матэрыял падрыхтаваны ў 2013 г.