Беларускі вучоны ў галіне гідрагеалогіі Міхаіл Фёдаравіч Казлоў нарадзіўся ў с. Дар'іна Суджанскага раёна Курскай вобласці (Расія). У 1934 г. закончыў Маскоўскі геолага-разведачны інстытут імя С. Арджанікідзе і быў накіраваны на працу ў Мінск у Інстытут геалогіі і гідрагеалогіі АН БССР (цяпер Інстытут геалогіі). З чэрвеня 1941 па 1944 г. у радах Чырвонай Арміі, прымаў удзел у Вялікай Айчыннай вайне. Пасля вайны і да 1991 г. працаваў у інстытуце: спачатку загадчыкам сектара гідрагеалогіі, намеснікам дырэктара па навуковай рабоце, потым загадчыкам лабараторыі геахімічных праблем, вядучым навуковым супрацоўнікам-кансультантам.

Навуковыя інтарэсы М.Ф. Казлова былі звязаны з патрабаваннямі народнай гаспадаркі краіны. Яго першыя распрацоўкі па інжынернай геалогіі былі пакладзены ў аснову планавай забудовы Мінска. Гідролаг прымаў удзел у абгрунтаванні крыніц водазабеспячэння буйных гарадоў і прамысловых прадпрыемстваў, пошуках і разведцы мінеральных вод для санаторыяў і прафілакторыяў, займаўся вывучэннем гідрагеалагічных умоў Прыпяцкага Палесся ў сувязі з правядзеннем меліярацыйных работ. У 1979 г. М.Ф. Казлоў стаў доктарам геолага-мінералагічных навук, абараніўшы доктарскую дысертацыю на тэму «Гидрогеология Припятского Полесья». Ім апублікавана больш за 130 навуковых прац і 6 манаграфій, сярод іх – «Количественная оценка питания грунтовых вод в северной части Припятского Полесья» (у суаўтарстве, 1972), «Режим подземных вод и влаги в зоне аэрации на территории Белорусского Полесья» (разам з В.П. Васільевым, 1974), «Основы теории и методики ландшафтной индикации гидрогеологических и инженерно-геологических условий в районах осушительной мелиорации» (у суаўтарстве, 1979), «Мелиорация и освоение поймы Припяти» (у суаўтарстве, 1982) і інш. Найбольш буйнымі навуковымі працамі М.Ф. Казлова сталі спецыяльныя гідрагеалагічныя карты Беларускага Палесся і манаграфія «Гидрогеология Припятского Полесья» (у 2 т., 1976–1977), за якую вучоны ў 1982 г. быў удастоены Дзяржаўнай прэміі БССР.

Акрамя навуковай дзейнасці М.Ф. Казлоў займаўся педагагічнай работай. Ён чытаў лекцыйныя курсы ў Беларускім дзяржаўным універсітэце і Беларускім політэхнічным інстытуце. Пад яго кіраўніцтвам і непасрэдным удзеле было абаронена больш за 10 кандыдацкіх і доктарскіх дысертацый. Таксама вучоны актыўна выступаў на многіх канферэнцыях і сімпозіумах па гідрагеалогіі, падземных водах, інжынернай геалогіі, меліярацыйнай гідрагеалогіі і іншых пытаннях. Навуковая і грамадская дзейнасць М.Ф. Казлоўскага адзначана ордэнам «Знак Пашаны», медалямі, ганаровымі граматамі. У 1981 г. ён стаў заслужаным дзеячам навукі і тэхнікі БССР.

Матэрыял падрыхтаваны ў 2019 г.