Беларускі вучоны ў галіне неўрапаталогіі, адзін з заснавальнікаў новага кірунку ў медыцыне – медыцынскага прагназавання з выкарыстаннем ЭВМ, Мікалай Сямёнавіч Місюк нарадзіўся ў г. Котлас Архангельскай вобласці (Расія) у сям'і машыніста рачнога параходства. Закончыўшы сярэднюю школу ў 1938 г. стаў студэнтам лячэбнага факультэта 1-га Ленінградскага медыцынскага інстытута. Праз год перавёўся на ваенна-медыцынскі факультэт, а затым у Ленінградскую ваенна-марскую медыцынскую акадэмію, якую скончыў у 1942 г. У час Вялікай Айчыннай вайны быў ваенным хірургам медыка-санітарнага ўзвода марской пяхоты «Чорныя бушлаты», а потым урачом-ардынатарам хірургічнага аддзялення шпіталя Чырванасцяжнага Паўночнага ваенна-марскога флоту. За ўдзел у баявых дзеяннях М. С. Місюк узнагароджаны ордэнам Чырвонай Зоркі і медалямі. Пасля вайны ў 1945 г. быў залічаны ў ад'юнктуру нейрахірургічнай клінікі Ленінградскай ваенна-марской медыцынскай акадэміі. У 1948 г. абараніў кандыдацкую дысертацыю на тэму «О лечении артериальной гипертонии». Да 1956 г. працаваў асістэнтам, дацэнтам, а затым загадчыкам клінікі нервовых хвароб Ленінградскага інстытута ўдасканалення ўрачоў. У клініцы М. С. Місюк арганізаваў аперацыйны блок, дзе праводзіў складаныя аперацыі па нейрахірургіі, займаўся са студэнтамі, чытаў лекцыі. У гэты перыяд пры яго ўдзеле быў створаны першы айчынны стэрэатаксічны апарат, праведзены першыя стэрэатаксічныя аперацыі на падкоркавых структурах пры хваробах галаўнога мозга. Гэтай праблеме была прысвечана доктарская дысертацыя на тэму «Опыт интрацеребральных инъекций лекарственных веществ». У 1957 г. яму прысвоена вучоная ступень доктара медыцынскіх навук, у 1958 г. – вучонае званне прафесара.

У 1960 г. М. С. Місюк пераехаў у Мінск, дзе навуковая дзейнасць вучонага была звязана з Мінскім медыцынскім інстытутам. З 1960 па 1989 г. загадваў кафедрай нервовых хвароб. У 1969 г. выбраны членам-карэспандэнтам АМН СССР. У 1989–1990 гг. з'яўляўся прафесарам кафедры, адначасова кіраваў навукова-даследчай групай АМН СССР па прагназаванні ўзнікнення мазгавых інсультаў. Вучоны стаў найбуйнейшым спецыялістам у галіне медыцынскай і прыкладной кібернетыкі, пачынальнікам распрацовак і ўкараненняў у клінічную неўрапаталогію прыкладных аспектаў тэорый інфармацыі і распазнавання захворванняў на базе электронна-вылічальнай тэхнікі. Вынікі навуковых даследаванняў прадстаўляліся на міжнародных кангрэсах, канферэнцыях і з'ездах у Італіі, Германіі, Японіі, Расіі, Украіне, Літве, Эстоніі, Малдове і інш. Ён з'яўляецца аўтарам больш за 250 навуковых работ, у тым ліку 38 манаграфій, рэдактарам 20 зборнікаў навуковых прац, аўтарам артыкулаў для выдання «Большая медицинская энциклопедия». Вялікае навукова-практычнае значэнне маюць яго дапаможнікі «Элементы топической диагностики заболеваний нервной системы» і «Основы топической диагностики заболеваний нервной системы» (у суаўтарстве, 1974), «Нервные болезни» (у суаўтарстве, 1977), «Нервные болезни (основы топической диагностики)» (у суаўтарстве, 1984), «Нервные болезни (клиника, лечение)» (у суаўтарстве, 1985), а таксама манаграфіі «Элементы автоматизации диагностического процесса в невропатологии» (у суаўтарстве, 1970), «ЭВМ в диагностике нервных заболеваний» (1978). Вынікі даследаванняў абагульніў у такіх навуковых працах, як «Основы математического прогнозирования заболеваний человека» (у суаўтарстве, 1972), «Мозговой инсульт (прогнозирование и профилактика)» (у суаўтарстве, 1980), «Система прогнозирования мозговых инсультов с помощью таблиц» (1983), «Прогнозирование и профилактика острых нарушений мозгового кровообращения» (1987) і інш. Пытанням неадкладнай дапамогі ў неўрапаталогіі прысвечаны манаграфіі «Неотложная помощь при острых заболеваниях нервной системы» (1959), «Неотложная помощь в невропатологии» (у суаўтарстве, 2-е выданне, перапрацаванае і дапоўненае, 1990) і інш. На працягу многіх гадоў М. С. Місюк быў членам экспертнай камісіі ВАК СССР, старшынёй секцыі медыцынскай кібернетыкі пры Беларускім навукова-тэхнічным таварыстве, старшынёй камісіі па медыцынскай кібернетыкі Усесаюзнага таварыства неўрапатолагаў, членам прэзідыума Усесаюзнага таварыства неўрапатолагаў. Мікалай Сямёнавіч Місюк – заснавальнік педагагічнай школы неўрапатолагаў Беларусі. Падрыхтаваў 4 дактары і 32 кандыдаты медыцынскіх наук. Яго вучні працягваюць развіваць і ўкараняць атрыманыя распрацоўкі ў практычную працу аховы здароўя Беларусі.

Матэрыял падрыхтаваны ў 2020 г.