Вядомы ў Рэспубліцы Беларусь хірург, таленавіты навуковец і педагог Міхаіл Рыгоравіч Сачак нарадзіўся ў в. Варонічы Слонімскага раёна Гродзенскай вобласці ў сялянскай сям'і. У 1949 г., скончыўшы сярэднюю школу, паступіў у Віцебскі медыцынскі інстытут на лячэбна-прафілактычны факультэт. Пасля заканчэння вучобы ў 1955 г. быў накіраваны загадчыкам Дварэцкага ўрачэбнага ўчастка Чашніцкага раёна Віцебскай вобласці, дзе працаваў да верасня 1956 г. Затым быў пераведзены на пасаду хірурга Лепельскай бальніцы. У 1958 г. прызначаны галоўным урачом гэтай жа бальніцы, а пасля скасавання раённага аддзела аховы здароўя – галоўным урачом Лепельскага раёна. За час працы двойчы выбіраўся дэпутатам раённага Савета дэпутатаў працоўных. У 1961 г. паступіў у завочную аспірантуру па хірургіі Віцебскага медыцынскага інстытута. У 1963 г. М. Р. Сачак прызначаны галоўным хірургам Віцебскага абласнога аддзела аховы здароўя. Дыяпазон аперацый, якія ён праводзіў, быў самым шырокім і разнастайным: абдамінальная і таракальная хірургія, гнойная хірургія, уралогія, акушэрства і гінекалогія, артапедыя і траўматалогія. У 1965 г. абараніў кандыдацкую дысертацыю на тэму «Резекция трахеи и главных бронхов».У 1966 г. М. Р. Сачак стаў асістэнтам кафедры шпітальнай хірургіі Віцебскага дзяржаўнага медыцынскага інстытута. З гэтага часу ўсё яго жыццё звязана з навучальнай установай. У 1971 г. ён дацэнт кафедры шпітальнай хірургіі. У 1975 г. абараніў доктарскую дысертацыю на тэму «Возможности восстановления функции легочной ткани после обтурационного ателектаза». Упершыню была паказана магчымасць поўнага аднаўлення лёгкіх пасля працяглага яго ацелектазу (адсутнасць паветра ва ўчастках лёгачнай тканіны). У 1978 г. М. Р. Сачаку прысвоена вучонае званне прафесара. 31 ліпеня 1979 г. прызначаны рэктарам Віцебскага дзяржаўнага медыцынскага інстытута і больш за 17 гадоў узначальваў яго. Шмат увагі надаваў паляпшэнню і пашырэнню матэрыяльнай базы, падрыхтоўцы кадраў, развіццю навуковых даследаванняў, аказваў практычную дапамогу ахове здароўя Віцебска і Віцебскай вобласці. У 1984 г., займаючы пасаду рэктара, М. Р. Сачак выбраны на пасаду загадчыка кафедры хірургічных хвароб №1 (кафедра шпітальнай хірургіі), дзе працаваў да 2014 г. У 1981 г. М. Р. Сачаку прысвоена званне «Заслужаны дзеяч навукі БССР». У 1997 г. выбраны Ганаровым сапраўдным членам (акадэмікам) Беларускай акадэміі медыцынскіх навук (цяпер Аддзяленне медыцынскіх навук НАН Беларусі). Вынікі навуковай дзейнасці вучонага – гэта больш за 400 навуковых прац, 13 манаграфій. Сярод іх – «Восстановительная хирургия внутригрудных дыхательных путей» (разам з У. У. Анічкіным, 1982), «Послеоперационные осложнения в абдоминальной хирургии» (разам з У. У. Анічкіным, 1986), «Послеоперационный период» (разам з У. У. Анічкіным, 1987), «Изолированная резекция бифуркации трахеи» ( у суаўтарстве, 1992) і інш. Мае 10 вынаходніцтваў, 35 рацыяналізатарскіх прапаноў. Пад яго кіраўніцтвам падрыхтаваны 4 дактары і 23 кандыдаты навук.

Міхаіл Рыгоравіч Сачак спалучаў прафесійную дзейнасць з грамадскай працай. Ён выбіраўся дэпутатам Віцебскага абласнога Савета народных дэпутатаў, членам аблвыканкама, Віцебскага гаркама КПБ, членам Савета па вышэйшай медыцынскай адукацыі Міністэрства аховы здароўя СССР, старшынёй праўлення абласнога таварыства хірургаў, членам рэдакцыйнага савета часопісаў «Здравоохранение Белоруссии» і «Новости хирургии», старшынёй Савета дружбы таварыства «СССР-Канада », старшынёй абласнога фонду міласэрнасці, членам атэстацыйнай камісіі Міністэрства вышэйшай і спецыяльнай адукацыі СССР па інспекцыі і акрэдытацыі вышэйшых медыцынскіх навучальных устаноў.

Выдатнік аховы здароўя, выдатнік адукацыі Беларусі, вынаходнік СССР М. Р. Сачак узнагароджаны ордэнам «Знак Пашаны», медалямі, ганаровымі граматамі. У 1999 г. стаў Ганаровым грамадзянінам Віцебска. Сёння многія вучні працягваюць развіваць яго навукова-педагагічную школу, узначальваюць кафедры, буйныя навучальныя і медыцынскія ўстановы.

Матэрыял падрыхтаваны ў 2019 г.