Творчасць Міхаіла Ясеня (сапраўднае імя Міхаіл Аронавіч Гольдман) з’яўляецца яркай старонкай паэтычна-песеннай культуры Беларусі. Многія яго вершы былі пакладзены на музыку і сталі папулярнымі песнямі.

Нарадзіўся паэт у Мінску ў сям’і рабочага. Рана навучыўся чытаць і захапляўся кнігамі. Пасля заканчэння школы паступіў у будаўнічы тэхнікум, аднак з пачаткам Вялікай Айчыннай вайны разам з сям’ёй эвакуіраваўся на ўсход. Некаторы час працаваў рабочым на метызным заводзе ў Сталінградзе. У васямнаццацігадовым узросце стаў чырвонаармейцам. Быў салдатам, артылерыйскім разведчыкам, сувязістам, тапографам на Волхаўскім і Ленінградскім франтах, прымаў удзел у прарыве блакады Ленінграда, штурмаваў лінію Манергейма. За ваенныя заслугі быў адзначаны ордэнам Айчыннай вайны II ступені, медалямі «За адвагу», «За абарону Ленінграда», «За перамогу над Германіяй у Вялікай Айчыннай вайне 1941–1945 гг.» і інш.

Пасля дэмабілізацыі ў 1947 г. Міхаіл Аронавіч вярнуўся на радзіму, працаваў у праектна-канструктарскай установе, скончыў школу рабочай моладзі і машынабудаўнічы факультэт Беларускага політэхнічнага інстытута (1956). У гэты ж перыяд пачаў займацца літаратурнай творчасцю. Быў рэдактарам насценнай газеты, пісаў гумарэскі, сцэнарыі студэнцкіх вечарын. Яго вершы пачалі з’яўляцца ў перыядычным друку. Па парадзе пісьменніцы А. Васілевіч стаў выкарыстоўваць псеўданім Міхаіл Ясень. Пасля заканчэння навучання працаваў інжынерам-канструктарам у Мінску. За гады прафесійнай дзейнасці атрымаў 15 аўтарскіх пасведчанняў на вынаходніцтвы, быў узнагароджаны сярэбраным медалём ВДНГ СССР, стаў лаўрэатам Усесаюзнага конкурсу тэхнічнай творчасці (1966). Адначасова працягваў займацца літаратурай. За паўвека творчай дзейнасці М. Ясень напісаў на беларускай і рускай мовах больш за 100 вершаў, якія захапляюць сваёй эмацыянальнай яскравасцю, значнасцю вобразаў, меладычнасцю. Галоўныя тэмы твораў – Вялікая Айчынная вайна, родная краіна, каханне. Паэтычныя радкі М. Ясеня лёгка кладуцца на музыку. У супрацоўніцтве з Я. Цікоцкім, У. Алоўнікавым, Л. Захлеўным, У. Буднікам, Э. Зарыцкім, Э. Казачковым, В. Сярых, Д. Смольскім, В. Войцікам і іншымі кампазітарамі было створана некалькі дзясяткаў мілагучных песень. Лепшымі ваеннымі песнямі лічацца «Письмо из 45-го», «Майский вальс», «Матери ждут сыновей», «Обелиски», «Победа», «Милосердие». Песня «Память сердца» (музыка І. Лучанка) у выкананні В. Вуячыча ў 1966 г. атрымала першую прэмію на Усесаюзным конкурсе на лепшую савецкую песню. Вядомымі сталі песні «Што такое песня», «Родны дом», «Беларусь мая», «Минская осень», «Зіма ў тваіх вачах», «Не трэба слоў», «Забудзем аб усім», «Мы яшчэ сустрэнемся», «Ніхто, акрамя цябе» і інш. Міхаіл Ясень з’яўляецца аўтарам кніг «Письмо из 45-го» (2001), «Война. Любовь. Победа» (2005). За заслугі ў развіцці нацыянальнай культуры паэт узнагароджаны Ганаровай граматай Нацыянальнага сходу Рэспублікі Беларусь (2003).

Матэрыял падрыхтаваны ў 2024 г.