Беларускі жывапісец Якуб Брэтцар нарадзіўся 23 ліпеня 1690 г. у Пінску. На жаль, дакладных звестак пра яго жыццё на захавалася, як не захавалася і шмат з яго прац. Вядома, што ён зрабіў размалёўку інтэр’ера касцёла езуітаў у Слуцку (1715–1717 гг., не захавалася), капліцы ў Полацку (1717–1721 гг.), стварыў абразы “Распяцце”, “Маці Божая”, шэраг партрэтаў. У 1721–1722 гг. у Мінскім кафедральным касцёле св. Станіслава майстар выканаў паліхромную размалёўку ў сакрысціях і алтар Маці Божай. У 1731–1732 гг. у Віцебску размаляваў карнізы і капітэлі ў езуіцкім касцёле, якія таксама не захаваліся. Напісаў абразы св. Андрэя Баболі і св. Тадэвуша. З 1732 г. жывапісец працаваў у Нясвіжы і Пінску. Аднак звестак аб працах Брэтцара ў касцёлах і цэрквах Пінска не захавалася.

Памёр жывапісец 11 жніўня 1733 г. ва ўзросце 43 гадоў.

Матэрыял падрыхтаваны ў 2011 г.