Бібік Фёдар Цярэнцьевіч

Дата рождения: 31.03.1910 Мазырскі раён, Гомельская вобласць

Дата смерти: 5 ці 2 мая 1945

Краткая справка: удзельнік Вялікай Айчыннай вайны, поўны кавалер ордэна Славы

Имена на других языках: Бибик Фёдор Терентьевич (русский);

Фёдар Цярэнцьевіч Бібік нарадзіўся на хутары Лапці (з 1954 г. – вёска Майская) Баброўскага сельсавета Мазырскага раёна (цяпер г. Мазыр Гомельскай вобласці). Атрымаў пачатковую адукацыю ў мясцовай школе, працаваў сталяром у калгасе, слесарам на нафтабазе Мазыра.

23 чэрвеня 1941 г. быў прызваны ў Чырвоную Армію, прымаў удзел у абарончых баях на тэрыторыі Беларусі і Украіны, трапіў у палон, праз пэўны час вярнуўся ў родную вёску. У студзені 1944 г. накіраваны ў 215-ы армейскі запасны стралковы полк 61-й арміі. Чырвонаармеец Бібік удзельнічаў у Беларускай, Вісла-Одэрскай і Берлінскай наступальных аперацыях, у абарончых баях у раёне гарадоў Ковель і Франкфурт-на-Одэры, ваяваў на Пулаўскім плацдарме, быў двойчы паранены.

Фёдар Цярэнцьевіч Бібік вызначыўся ў ліпені 1944 г. пры падрыхтоўцы да Брэсцка-Люблінскай наступальнай аперацыі. Выдатна авалодаўшы сапёрнай справай, ён неаднаразова ўдзельнічаў у выкананні адказных заданняў камандавання: рабіў праходы ў драцяной загародзе і мінных палях праціўніка, прымаў удзел у фарсіраванні рэк і прарыве абароны праціўніка. Загадам ад 20 ліпеня 1944 г. гвардыі чырвонаармеец Фёдар Цярэнцьевіч Бібік быў узнагароджаны ордэнам Славы 3-й ступені.

У ходзе баёў за ўтрыманне і пашырэнне Пулаўскага плацдарма сапёр-разведчык Бібік прымаў удзел у мініраванні пярэдняга краю абароны і неаднаразова рабіў праходы ў мінных палях праціўніка. Загадам ад 24 кастрычніка 1944 г. гвардыі чырвонаармеец Фёдар Цярэнцьевіч Бібік быў узнагароджаны ордэнам Славы 2-й ступені.

Зімой 1945 г. яфрэйтар Бібік праявіў адвагу і баявое майстэрства пры прарыве варожай абароны на левым беразе Віслы, адважна дзейнічаў у наступных наступальных баях у раёне Лодзі быў прадстаўлены да ордэна Славы 1-й ступені.

Заслужаную ўзнагароду сапёр Бібік атрымаць не паспеў: памёр ад ран у маі 1945 г. Указам Прэзідыума Вярхоўнага Савета СССР ад 15 мая 1946 г. гвардыі яфрэйтар Фёдар Цярэнцьевіч Бібік быў узнагароджаны ордэнам Славы 1-й ступені пасмяротна.

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта “Герои страны”.