Іван Ядзешка нарадзіўся ў в. Сцяцкі Гродзенскага раёна Гродзенскай вобласці. Пачынаў юнак сур'ёзныя заняткі спортам з бокса, але яго высокі рост прыцягнуў увагу дзіцячага баскетбольнага трэнера Анатоля Марцінкевіча, які запрасіў Івана Ядзешку ў сваю секцыю. Працягнуў заняткі з таленавітым падлеткам Якаў Фруман. Пазней Ядзешка пераехаў у Мінск, выступаў у 60-я за каманду "Спартак", пазней за баскетбольную каманду Мінскага радыётэхнічнага інстытута.

У 1970 г. Іван Ядзешка быў мабілізаваны ў армію і пачаў выступаць за славуты клуб ЦСКА (Масква) пад кіраўніцтвам таленавітага трэнера Аляксандра Гомельскага. У складзе ЦСКА спартсмен стаў васьміразовым чэмпіёнам СССР.

У гэтым жа 1970 годзе зборную каманду СССР па баскетболе ўзначаліў трэнер-наватар Уладзімір Кандрашын, які таксама па заслугах ацаніў талент Івана Ядзешкі. Разам з гэтым трэнерам савецкая зборная выйграла залатыя медалі Універсіяды 1970 года, залатыя медалі чэмпіянату Еўропы 1971 года і ў якасці аднаго з фаварытаў падышла да Алімпійскіх гульняў 1972 года ў Мюнхене. Алімпійскі баскетбольны фінал–1972 СССР–ЗША стаў адным з самых напружаных і запамінальных ў гісторыі гульняў. Калі да канца матчу заставалася ўсяго 3 секунды, амерыканцы вялі ў ліку 50:49. Вырашальную атаку трэнер Уладзімір Кандрашын даверыў менавіта Івану Ядзешку. Спартсмен здолеў перадаць пас праз усю пляцоўку свайму таварышу Аляксандру Бялову, які імгненна накіраваў мяч у кольца саперніка. Заключныя 3 секунды змянілі лік на 50:51 ужо на карысць зборнай Савецкага Саюза, якая здолела ўпершыню за ўсю гісторыю алімпійскага руху абыграць амерыканцаў у фінале баскетбольнага турніру.

На летніх Алімпійскіх гульнях у 1976 годзе ў Манрэалі савецкая зборная пад кіраўніцтвам усё таго ж Уладзіміра Кандрашына заваявала яшчэ і бронзавы медаль. Такім чынам, Іван Ядзешка разам з усёй сваёй камандай стаў бронзавым прызёрам Гульняў.

Пасля заканчэння сваёй актыўнай спартыўнай кар'еры спартсмен перайшоў на трэнерскую пасаду, дзе таксама здолеў дамагчыся сур'ёзных поспехаў. У часы яго кіраўніцтва камандай ЦСКА, у 1992 годзе яна стала чэмпіёнам Расіі. У 1993 годзе Іван Ядзешка працаваў галоўным трэнерам ліванскага клуба "Спортынг", які стаў чэмпіёнам краіны. У 1998 годзе алімпійскі чэмпіён вярнуўся ў Расію, дзе ўзначальваў з 1998 па 2000 год юніёрскую зборную Расіі. З 2000 года Іван Ядзешка працаваў галоўным трэнерам зборнай моладзі Расіі.

З 1991 года ў Мінску праходзіць баскетбольны турнір дзіцячых каманд на прызы алімпійскага чэмпіёна Івана Ядзешкі.

Даведка падрыхтавана на аснове матэрыялаў сайта Нацыянальнага алімпійскага камітэта Рэспублікі Беларусь у 2019 г.