Акцёр характарнага плана Станіслаў Іванавіч Яворскі нарадзіўся 16 красавіка 1915 г. у Брэсце. Пасля заканчэння ў 1938 г. студыі пры Першым беларускім дзяржаўным тэатры (мастацкі кіраўнік Л. Літвінаў) С. І. Яворскі пачаў свой творчы шлях у гэтым жа тэатры. З 1939 г. акцёр працаваў у Заслаўскім калгасна-саўгасным тэатры. Тут найбольш поўна яго творчая індывідуальнасць выявілася ў ролях Маргуна і Шмігельскага (“Партызаны” К. Крапівы).

У 1939–1941 гг. і з 1945 г. Станіслаў Іванавіч выступаў у Пінскім абласным драматычным тэатры. Яркі тэмперамент, сакавіты гумар, непасрэднасць сцэнічнага існавання, уменне знайсці трапныя дэталі – усё гэта акцёр ўмела прадэманстраваў у ролі Суддзі (“Несцерка” В. Вольскага). Сярод іншых яго роляў з беларускага рэпертуару: Левановіч і Нічыпар (“Хто смяецца апошнім” К. Крапівы), Здаравеня (“Пяюць жаваранкі” К. Крапівы), Быкоўскі (“Паўлінка” Я. Купалы), Калібераў (“Выбачайце, калі ласка!” А. Макаёнка), фон Кубэ (“Гэта было ў Мінску” А. Кучара).

У 1954 г. Пінскі абласны драматычны тэатр быў пераведзены ў Магілёў і стаў называцца Магілёўскім абласным драматычным тэатрам. У ім С. І. Яворскі працягнуў сваю творчую дзейнасць. У выкананні акцёра вылучаліся вобразы Глуздакова (“Лявоніха на арбіце” А. Макаёнка), Мякішава (“Пад адным небам” А. Маўзона), Мікалая ІІ (“Галоўная стаўка” К. Губарэвіча), Мікіты Сямёнавіча (“Даруй мне” К. Губарэвіча).

З іншых прац С. І. Яворскага: Чыр (“Любоў Яравая” К. Транёва), Аркадзь (“Платон Крэчат” А. Карнейчука), Карандышаў (“Беспасажніца” А. Астроўскага), Лешч (“Апошнія” М. Горкага), патэр Сарыні (“Іспанцы” М. Лермантава) у Пінскім тэатры; Дульскі (“Мараль пані Дульскай” Г. Запольскай), Мікандр Радуткін (“Чалавек з партфелем” А. Файко), Лаўруха (“Трэцяя, патэтычная” М. Пагодзіна), Калакольнікаў (“Персанальная справа” А. Штэйна), клоўн Бом (“Інтэрв’ю ў Буэнас-Айрасе” Г. Баравіка) у Магілёўскім тэатры.

Сцэнічная выразнасць, дакладны малюнак ролі, мяккі гумар, шчырасць і прастата ўласцівы мастцатву С. І. Яворскага. У 1959 г. яму было прысуджана ганаровае званне заслужанага артыста Беларусі.

Матэрыял падрыхтаваны ў 2011 г.