Вячаслаў Сяргеевіч Танаеў нарадзіўся ў в. Акулава Бежацкага раёна Цвярской вобласці (Расія). У 1962 г. скончыў фізіка-матэматычны факультэт Крымскага педагагічнага інстытута імя М.В. Фрунзэ (зараз Таўрычаскі нацыянальны ўніверсітэт імя У. І. Вярнадскага). Вучыўся ў аспірантуры і працаваў на кафедры матэматыкі ў гэтым жа інстытуце. Пасля абароны кандыдацкай дысертацыі В.С. Танаеў з 1965 г. працаваў у Інстытуце тэхнічнай кібернетыкі Акадэміі навук БССР (зараз Аб’яднаны інстытут праблем інфарматыкі Нацыянальнай акадэміі навук Беларусі), спачатку галоўным інжынерам, потым загадчыкам лабараторыі дыскрэтнага праграмавання, якая займалася развіццём тэорыі раскладаў і распрацоўкай метадаў рашэння складаных аптымізацыйных задач.

З 1971 г. Танаеў В.С. узначальваў лабараторыю матэматычнай кібернетыкі. Вучоны ўнёс вялікі ўклад у стварэнне метадаў вырашэння шэрага важных прыкладных задач, якія ўзнікаюць у аўтаматызаваных сістэмах праектавання. За даследаванні ў галіне параметрычнай дэкампазіцыі аптымізацыйных задач В.С. Танаеву ў 1978 г. прысуджана вучоная ступень доктара фізіка-матэматычных навук, а ў 1980 г. – вучонае званне прафесара. У 1987 г. прызначаны дырэктарам Інстытута тэхнічнай кібернетыкі Акадэміі навук БССР. Адначасова з 1996 г. быў генеральным дырэктарам навукова-даследчага аб’яднання «Кібернетыка» Нацыянальнай Акадэміі навук Беларусі. У 1994 г. ён выбраны членам-карэспандэнтам, а ў 2000 г. – сапраўдным членам Нацыянальнай акадэміі навук Беларусі.

Вучоны ўнёс значны ўклад у развіццё тэорыі раскладаў і агульнай тэорыі параметрычнай дэкампазіцыі задач аптымізацыі. Танаеў В.С. – аўтар больш за 130 навуковых прац, у тым ліку 10 манаграфій. Сярод іх – «Введение в теорию расписаний» (1975, у суаўтарстве), «Теория расписаний. Одностадийные системы» (1984, у суаўтарстве), «Теория расписаний. Многостадийные системы» (1989, у суаўтарстве), «Математические модели и методы календарного планирования» (1994, у суаўтарстве) і інш. Пад яго кіраўніцтвам абаронена 18 кандыдацкіх і 7 доктарскіх дысертацый.

Танаеў В.С. быў каардынатарам Рэспубліканскай праграмы фундаментальных даследаванняў «Інтэлект», старшынёй навуковага савета «Інфармацыйныя тэхналогіі», навуковым кіраўніком Дзяржаўнай праграмы фундаментальных даследаванняў «Інфатэх», дзяржаўнай навукова-тэхнічнай праграмы «Інфармацыйныя тэхналогіі», двух сумесных беларуска-расійскіх праграм «Космас – БР» і «Суперкамп’ютар», намеснікам акадэміка-сакратара Аддзялення фізікі, матэматыкі і інфарматыкі НАН Беларусі, намеснікам галоўнага рэдактара часопіса «Весці НАН Беларусі. Серыя фізіка-матэматычных навук», старшынёй савета па абароне дысертацый пры Інстытуце тэхнічнай кібернетыкі і членам саветаў па абароне дысертацый пры Інстытуце матэматыкі НАН Беларусі і Беларускім дзяржаўным універсітэце, прэзідэнтам, сапраўдным членам Брытанскага інстытута інжэнераў-электрыкаў.

За выдатныя навуковыя дасягненні і плённую педагагічную дзейнасць вучонаму ў 1995 г. прысвоена ганаровае званне «Заслужаны дзеяч навукі Рэспублікі Беларусь». У 1998 г. за цыкл навуковых прац «Модели и методы теории расписаний» (у суаўтарстве) яму прысвоена Дзяржаўная прэмія Рэспублікі Беларусь у галіне прыродазнаўчых навук, а за манаграфію «Теория расписаний. Групповые технологии» (1998, у суаўтарстве) па выніках конкурсу 2001 г. – прэмія Нацыянальнай акадэміі навук Беларусі. У 2000 г. арганізацыя «Ветэраны космаса» (Расія) узнагародзіла В.С. Танаева ганаровым знакам «За асваенне космаса».

Матэрыял падрыхтаваны ў 2020 г.