Вялікае значэнне ў грамадскім жыцці Полацка на мяжы ХIХ–ХХ стст. мела дзейнасць Івана Іванавіча Далгова.

Нарадзіўся ён у Санкт-Пецярбургскай губерні. Скончыў Санкт-Пецярбургскі Імператарскі ўніверсітэт (1880). З 1889 г. выкладаў у Полацкім кадэцкім корпусе. Працаваў таксама ў жаночай гімназіі, Спаса-Еўфрасіннеўскім епархіяльным вучылішчы. Выступаў з лекцыямі, якія заўсёды аказвалі моцнае ўражанне на слухачоў. У 1899 г. напісаў гісторыю полацкага кадэцкага корпуса (1835–1990-я гг.) і стаў адным з арганізатараў створанага ў ім музея.

Іван Іванавіч Далгоў вывучаў гісторыю Полацка са старажытных часоў, даследаваў археалагічныя помнікі Полаччыны і склаў іх рэестр. Ён аўтар навукова-папулярных артыкулаў «Прошлое и настоящее Белоруссии» (Витебские губернские ведомости. 1897. № 19), «Наш край» (Там жа. 1898. № 113–114). Быў не толькі вялікім знатаком полацкіх старажытнасцей, але і прыхільнікам захавання іх у цэласці. Актыўна выступаў за рэстаўрацыю храмаў, праводзіў улік і апісанне цэркваў і прыходаў Полацка-Віцебскай епархіі. Як член камітэта па рамонце Сафійскага сабора змагаўся за захаванне будынка і стварэнне ў яго падземнай частцы капліцы або царквы-крыпты ці часоўні з адкрыццём кладкі старажытных калон і сцен. Як член Полацкага Епархіяльнага Савета працаваў над падрыхтоўкай і правядзеннем святочных мерапрыемстваў у час перанясення мошчаў Еўфрасінні Полацкай на радзіму ў 1910 г. Быў абраны правадзейным членам Віцебскай навуковай архіўнай камісіі, у рамках яе работы ўдзельнічаў у даследаванні курганоў і пахаванняў фінскага і славянскага плямён у межах Віцебскай губерні. Ён уваходзіў таксама ў царкоўнае брацтва, Полацкае дабрачыннае таварыства і іншыя аб'яднанні. З'яўляўся ўдзельнікам IХ Археалагічнага з'езда (1893, Вільня).

Іван Іванавіч Далгоў актыўна заахвочваў моладзь да вывучэння гісторыі свайго краю, прывіваў ёй любоў і павагу да родных мясцін. Неаднаразова праводзіў экскурсіі для навучэнцаў у Кіеў, Крым, Маскву, Паволжа, на Каўказ. Сярод шматлікіх калекцый І. І. Далгова была вялікая колькасць фотаздымкаў, паштовак з помнікамі архітэктуры і скульптуры, прыгожымі карцінамі, рэдкімі партрэтамі і іконамі і інш. Ён таксама захапляўся тэатрам і музыкай.

Матэрыял падрыхтаваны ў 2017 г.