Мікалай Мікалаевіч Дарагастайскі нарадзіўся каля 1530 г. Ён паходзіў з шляхецкага роду герба "Ляліва", прадстаўнікі якога ў XVI–XVII стст. займалі буйныя дзяржаўныя пасады ў Вялікім Княстве Літоўскім. М.М. Дарагастайскі займаў пасады стольніка літоўскага, ваяводы полацкага, старасты ваўкавыскага і лепельскага. Дзяржаўны і ваенны дзеяч ВКЛ удзельнічаў у рэдагаванні Статута ВКЛ 1566 г., у падрыхтоўцы Люблінскай уніі 1569 г., браў удзел у Інфлянцкай вайне 1558–1582 гг., ва ўзяцці ў 1579 г. Полацка, Сушы, Няшчэрды, у 1580 г. – Невеля.

Мікалай Дарагастайскі быў кальвіністам. Ён фінансаваў пераклад і выданне ў Лоску кнігі А. Фрыч-Маджэўскана "Аб удасканаленні Рэчы Паспалітай" (1577), якая зрабіла вялікі ўплыў на тагачаснае духоўнае жыццё і адыграла сваю ролю пры падрыхтоўцы Статута ВКЛ у 1588 г. Па адной з гістарычных версій, менавіта Мікалай Мікалаевіч пабудаваў кальвінскі збор і заснаваў друкарню ў Ашмянах у 1590 г., якую ў далейшым значна развіў яго сын Крыштоф.

Матэрыял падрыхтаваны ў 2011 г.