Батальёнак Ягор Ягоравіч

Дата рождения: 19.09.1946 Вялікія Труханавічы, в., Чашніцкі раён, Віцебская вобласць

Краткая справка: жывапісец-пейзажыст, педагог, творы якога захоўваюцца ў вядучых музеях Беларусі, музеях Расіі, Польшчы, ЗША, лаўрэат Першай прэміі прадстаўніцтва ААН у Беларусі (1996)

Имена на других языках: Batalionak Yagor Yagoravitch (не определен); Батальонок Егор Егорович (русский);

Ягор Ягоравіч Батальёнак нарадзіўся ў в. Вялікія Труханавічы Чашніцкага раёна Віцебскай вобласці. У 1968 г. скончыў мастацка-графічны факультэт Віцебскага педагагічнага інстытута імя С. М. Кірава (цяпер Віцебскі дзяржаўны ўніверсітэт імя П. М. Машэрава). Вучыўся ў Ф. Гумена і І. Сталярова. Менавіта дзякуючы ім мастак пранёс праз увесь творчы шлях ідэю свету прыроды як найвялікшай каштоўнасці. Пасля заканчэння інстытута займаўся выкладчыцкай дзейнасцю: працаваў у Бягомльскай школе-інтэрнаце (1968–1970), Рэспубліканскай школе-інтэрнаце па музыцы і выяўленчым мастацтве (1970–1988). З 1989 па 1992 г. супрацоўнічаў з нямецкай фірмай «Мікалай і сын», якая спецыялізавалася на продажы твораў мастацтва. Па запрашэнні галерэі «Кадо» займаўся творчай працай у г. Віторыя (Іспанія).

Мастак працуе пераважна ў жанры пейзажа і нацюрморта. Лепшыя яго творы вызначаюцца тонкім лірызмам і глыбокім пранікненнем у свет прыроды (карціны «Цвіце стары сад» (1974), «Лета на Віцебшчыне» (1977), «Ажыны» (1980), «Дзяцінства светлы дзень» (1981), «Дзе сон-трава» (1986), «Бабіна лета» (1989), «Напрадвесні» (1993), «Прыйшоў Ілля» (1994), нізка пастэляў «Родны край» (1993–1994), «Трывожная далеч» (2009), «На мяжы» (2012), «Вечаровы прасяг» (2014), «Да супакою» (2015) і інш.). Адметнасць жывапісных палотнаў Я. Я. Батальёнка ў тонкай, празрыстай акварэльнасці. Мастак імкнецца адлюстраваць разнастайны стан прыроды, уласнае пачуццёвае і філасофскае адчуванне прыродных з’яў («Райская яблыня» (2001), «На золку» (2004), «Паланэз» (2005), «Бераг восені» (2008) і інш.).

З 1974 г. Я. Я. Батальёнак удзельнічае ў мастацкіх выстаўках. Яго творы экспанаваліся ў Маскве, Санкт-Пецярбургу, Кіеве, Вільнюсе, Нарве, Арабскіх Эміратах, Іспаніі, Італіі, Польшчы, Балгарыі, Галандыі, Францыі, Германіі, ЗША. У 1996 г. мастак быў удастоены Першай прэміі прадстаўніцтва ААН у Беларусі за карціну «Повязь» з удзелам у міжнароднай выстаўцы «Хабітат-2» у Стамбуле (Турцыя). Ён з’яўляецца аўтарам кніг выслоўяў «Абярэг» (2006), «Бераг» (2012).

Творы мастака знаходзяцца ў Нацыянальным мастацкім музеі Рэспублікі Беларусь, Музеі сучаснага выяўленчага мастацтва Беларусі ў Мінску, фондах Беларускага саюза мастакоў, Магілёўскім мастацкім музеі імя П. В. Масленікава і іншых музеях і галерэях, у прыватных зборах у Беларусі і за мяжой.

Матэрыял падрыхтаваны ў 2021 г.